awwalin chand ne kya baat sujhai mujhko

avvalīñ chāñd ne kyā baat sujhā.ī mujh ko

yaad aa.ī tirī añgusht-e-hinā.ī mujh ko

sar-e-aivān-e-tarab naġhma-sarā thā koī

raat bhar us ne tirī yaad dilā.ī mujh ko

dekhte dekhte tāroñ kā safar ḳhatm huā

so gayā chāñd magar niind na aa.ī mujh ko

inhī āñkhoñ ne dikhā.e ka.ī bharpūr jamāl

inhīñ āñkhoñ ne shab-e-hijr dikhā.ī mujh ko

saa.e kī tarah mire saath rahe ranj o alam

gardish-e-vaqt kahīñ raas na aa.ī mujh ko

dhuup idhar Dhaltī thī dil Dūbtā jaatā thā idhar

aaj tak yaad hai vo shām-e-judā.ī mujh ko

shahr-e-lahore tirī raunaqeñ daa.im ābād

terī galiyoñ kī havā khīñch ke laa.ī mujh ko

awwalin chand ne kya baat sujhai mujh ko

yaad aai teri angusht-e-hinai mujh ko

sar-e-aiwan-e-tarab naghma-sara tha koi

raat bhar us ne teri yaad dilai mujh ko

dekhte dekhte taron ka safar KHatm hua

so gaya chand magar nind na aai mujh ko

inhi aankhon ne dikhae kai bharpur jamal

inhin aankhon ne shab-e-hijr dikhai mujh ko

sae ki tarah mere sath rahe ranj o alam

gardish-e-waqt kahin ras na aai mujh ko

dhup idhar Dhalti thi dil Dubta jata tha idhar

aaj tak yaad hai wo sham-e-judai mujh ko

shahr-e-lahore teri raunaqen daim aabaad

teri galiyon ki hawa khinch ke lai mujh ko