ayan ho aap begana banaya

ayaañ ho aap begāna banāyā

vajūd-e-ḳhāk kā shāna banāyā

tū hai alfāz se māhir ai vaa.iz

mujhe be-kaif-o-kam-ma.anā banāyā

kiyā iz.hār jab maiñ rāz-e-haq ko

to aalam mujh ko rindāna banāyā

hañsī se merī is ne Taal dī baat

maiñ thā hoshiyār dīvāna banāyā

mujhe saaqī ne be-minnat ke dī mai

ḳhumār-e-ishq-e-mardāna banāyā

pukārā ishq ne jā DhūñDh le yaar

tan-e-ḳhākī ko hai ḳhāna banāyā

uḌāyā baat meñ jo ḳhud-parastī

mujhe mul de ke mastāna banāyā

maiñ jaanā aap ko har haal maz.har

ba-zāhir banda farzāna banāyā

ai 'markaz' tujh se hai sab shaan zāhir

ajab ā.īna shāhāna banāyā

ayan ho aap begana banaya

wajud-e-KHak ka shana banaya

tu hai alfaz se mahir ai waiz

mujhe be-kaif-o-kam-mana banaya

kiya izhaar jab main raaz-e-haq ko

to aalam mujh ko rindana banaya

hansi se meri is ne Tal di baat

main tha hoshiyar diwana banaya

mujhe saqi ne be-minnat ke di mai

KHumar-e-ishq-e-mardana banaya

pukara ishq ne ja DhunDh le yar

tan-e-KHaki ko hai KHana banaya

uDaya baat mein jo KHud-parasti

mujhe mul de ke mastana banaya

main jaana aap ko har haal mazhar

ba-zahir banda farzana banaya

ai 'markaz' tujh se hai sab shan zahir

ajab aaina shahana banaya