azab-e-be-dili-e-jaan-e-mubtala na gaya

azāb-e-be-dili-e-jān-e-mubtalā na gayā

jo sar pe baar thā andesha-e-sazā na gayā

ḳhamosh ham bhī nahīñ the huzūr-e-yār magar

jo kahnā chāhte the bas vahī kahā na gayā

palaT ke dekhne kī ab to aarzū bhī nahīñ

thī āshiqī hameñ jab ḳhūb, vo zamāna gayā

rahe musir ki uThā deñ vo anjuman se hameñ

ham uThnā chāhte bhī the magar uThā na gayā

hamāre naam se jab zikr-e-bevafā.ī chalā

junūñ meñ bol paḌe ham se bhī rahā na gayā

hamārā qissa-e-ġham biich meñ vo chhoḌ uTThe

unhī kī zid thī magar un hī se sunā na gayā

zamāne bhar ne kahā 'arsh' jo, ḳhushī se sahā

par ek lafz jo us ne kahā sahā na gayā

azab-e-be-dili-e-jaan-e-mubtala na gaya

jo sar pe bar tha andesha-e-saza na gaya

KHamosh hum bhi nahin the huzur-e-yar magar

jo kahna chahte the bas wahi kaha na gaya

palaT ke dekhne ki ab to aarzu bhi nahin

thi aashiqi hamein jab KHub, wo zamana gaya

rahe musir ki uTha den wo anjuman se hamein

hum uThna chahte bhi the magar uTha na gaya

hamare nam se jab zikr-e-bewafai chala

junun mein bol paDe hum se bhi raha na gaya

hamara qissa-e-gham bich mein wo chhoD uTThe

unhi ki zid thi magar un hi se suna na gaya

zamane bhar ne kaha 'arsh' jo, KHushi se saha

par ek lafz jo us ne kaha saha na gaya