azab hum pe jo nazil hua KHuda se na tha

azaab ham pe jo nāzil huā ḳhudā se na thā

ki tū razā se muqaddar huā qazā se na thā

ye hāl-e-zār to āshob-e-āgahī se huā

ki gul-darīda-jigar mauja-e-sabā se na thā

khañDar to shahr-e-dil andar ke zalzaloñ se huā

ye zulm terī jafā yā tirī vafā se na thā

bikhre ga.e gul-e-nāzuk havā ke jhoñke se

gilā jo thā to nazākat se thā havā se na thā

dil-o-dimāġh pe thā iḳhtiyār ham ko bhī

hayāt par ye tasarruf tirā sadā se na thā

tirī hayāt khilaunā banī muqaddar kā

sabab ye hai ki tirā rābta ḳhudā se na thā

mujhe to jo bhī milā ā.ina-ba-dast milā

maiñ jabr-e-ġhair se thā ḳhud-nigar anā se na thā

azab hum pe jo nazil hua KHuda se na tha

ki tu raza se muqaddar hua qaza se na tha

ye haal-e-zar to aashob-e-agahi se hua

ki gul-darida-jigar mauja-e-saba se na tha

khanDar to shahr-e-dil andar ke zalzalon se hua

ye zulm teri jafa ya teri wafa se na tha

bikhre gae gul-e-nazuk hawa ke jhonke se

gila jo tha to nazakat se tha hawa se na tha

dil-o-dimagh pe tha iKHtiyar hum ko bhi

hayat par ye tasarruf tera sada se na tha

teri hayat khilauna bani muqaddar ka

sabab ye hai ki tera rabta KHuda se na tha

mujhe to jo bhi mila aaina-ba-dast mila

main jabr-e-ghair se tha KHud-nigar ana se na tha