azal se jo musalsal hai rawan wo karwan hum hain

azal se jo musalsal hai ravāñ vo kārvāñ ham haiñ

jo badle dam-ba-dam tāham hai qaa.em vo jahāñ ham haiñ

simaTne par agar aa.eñ to ik tan meñ simaT jaa.eñ

lageñ jab phailne to vus.at-e-kaun-o-makāñ ham haiñ

gila kyā jo nikālā ādam-o-havvā ko jannat se

usī ke aaj sadqe nāzim-e-bāġh-e-jahāñ ham haiñ

hue kab āshnā ham apnī hastī kī haqīqat se

hamārā raaz hai aisā ki ham se bhī nihāñ ham haiñ

jinheñ ham bulbulā paanī kā dikhte haiñ kaho un se

nazar ho dekhne vaalī to bahr-e-be-karāñ ham haiñ

ye sūraj chāñd taare sab chaleñ rāh-e-muayyan par

chuneñ ham raah ḳhud apnī ḳhud apne rāh-dāñ ham haiñ

yahāñ har aadmī masrūf hai apnī masāfat meñ

ruke pal-bhar koī to pūchh leñ us se kahāñ ham haiñ

azal se jo musalsal hai rawan wo karwan hum hain

jo badle dam-ba-dam taham hai qaem wo jahan hum hain

simaTne par agar aaen to ek tan mein simaT jaen

lagen jab phailne to wusat-e-kaun-o-makan hum hain

gila kya jo nikala aadam-o-hawwa ko jannat se

usi ke aaj sadqe nazim-e-bagh-e-jahan hum hain

hue kab aashna hum apni hasti ki haqiqat se

hamara raaz hai aisa ki hum se bhi nihan hum hain

jinhen hum bulbula pani ka dikhte hain kaho un se

nazar ho dekhne wali to bahr-e-be-karan hum hain

ye suraj chand tare sab chalen rah-e-muayyan par

chunen hum rah KHud apni KHud apne rah-dan hum hain

yahan har aadmi masruf hai apni masafat mein

ruke pal-bhar koi to puchh len us se kahan hum hain