azizo tum na kuchh usko kaho hua so hua

azīzo tum na kuchh us ko kaho huā so huā

nipaT hī tund hai zālim kī ḳhū huā so huā

ḳhatā se us kī nahīñ naam ko ġhubār-e-malāl

maiñ ro ro Daalā hai sab dil se dho huā so huā

mirī ḳhatā yā jafā thī tirī ye kyā hai zikr

huā jo chāhiye phir to na ho huā so huā

hañse hai dil meñ ye nā-dardmand sab sun sun

to dukh ko ishq ke ai dil na ro huā so huā

sitamgaro jo tumheñ rahm kī ho kuchh taufīq

sitam kī apne talāfī karo huā so huā

tū kaun hai ki ho milne se ġhair kai maan.e

dil us ko haath se apne na kho huā so huā

na sarguzisht mirī pūchh mujh se kuchh ai baḳht

tū apne ḳhvāb-e-farāġhat meñ so huā so huā

mohabbat ek tarah kī nirī samājat hai

maiñ chhoḌūñ huuñ tirī ab justujū huā so huā

bayān-e-hāl se ruktā hai 'hasrat' ab yaaro

na pūchho us se na kuchh tum kaho huā so huā

azizo tum na kuchh us ko kaho hua so hua

nipaT hi tund hai zalim ki KHu hua so hua

KHata se us ki nahin nam ko ghubar-e-malal

main ro ro Dala hai sab dil se dho hua so hua

meri KHata ya jafa thi teri ye kya hai zikr

hua jo chahiye phir to na ho hua so hua

hanse hai dil mein ye na-dardmand sab sun sun

to dukh ko ishq ke ai dil na ro hua so hua

sitamgaro jo tumhein rahm ki ho kuchh taufiq

sitam ki apne talafi karo hua so hua

tu kaun hai ki ho milne se ghair kai mane

dil us ko hath se apne na kho hua so hua

na sarguzisht meri puchh mujh se kuchh ai baKHt

tu apne KHwab-e-faraghat mein so hua so hua

mohabbat ek tarah ki niri samajat hai

main chhoDun hun teri ab justuju hua so hua

bayan-e-haal se rukta hai 'hasrat' ab yaro

na puchho us se na kuchh tum kaho hua so hua