azmat-e-ahl-e-junun pas-e-wafa rakkha hai

'azmat-e-ahl-e-junūñ pās-e-vafā rakkhā hai

chāk-e-dāman ko rafūgar se bachā rakkhā hai

dil ke pahlū meñ koī sham' jalā rakkhī hai

sīna-e-shauq ko parvāna banā rakkhā hai

fitna-e-qāmat-e-zebā kī hikāyat mat pūchh

roz-e-mahshar se pare hashr uThā rakkhā hai

mid.hat-e-zill-e-ilāhī nahīñ hogī ham se

ham ne inkār kā me'yār bachā rakkhā hai

marhabā shoḳhī-o-'ayyārī-e-mā'shūq 'nadīm'

'ishq ko husn ke parde meñ chhupā rakkhā hai

'azmat-e-ahl-e-junun pas-e-wafa rakkha hai

chaak-e-daman ko rafugar se bacha rakkha hai

dil ke pahlu mein koi sham' jala rakkhi hai

sina-e-shauq ko parwana bana rakkha hai

fitna-e-qamat-e-zeba ki hikayat mat puchh

roz-e-mahshar se pare hashr uTha rakkha hai

midhat-e-zill-e-ilahi nahin hogi hum se

hum ne inkar ka me'yar bacha rakkha hai

marhaba shoKHi-o-'ayyari-e-ma'shuq 'nadim'

'ishq ko husn ke parde mein chhupa rakkha hai