azmat-e-shahar-e-ana shan-e-bashar ki surat

azmat-e-shahar-e-anā shān-e-bashar kī sūrat

mere shānoñ pe koī hai mire sar kī sūrat

roz utartā hai samundar meñ sunahrā sūraj

roz ban jaatī hai ik dīda-e-tar kī sūrat

dil jo sahrā ke sarāboñ se mirā uub gayā

yaad aa.ī mujhe bhūle hue ghar kī sūrat

aa ke nazdīk mire jalne kā manzar dekho

duur se sho.ala bhī lagtā hai sharar kī sūrat

āhaTeñ qadmoñ kī mohlat nahīñ detīñ varna

dekhte rahte haiñ raste bhī safar kī sūrat

kaun se ahd meñ kholī haiñ ye āñkheñ ham ne

aib lagte haiñ 'suḳhan' sab ke hunar kī sūrat

azmat-e-shahar-e-ana shan-e-bashar ki surat

mere shanon pe koi hai mere sar ki surat

roz utarta hai samundar mein sunahra suraj

roz ban jati hai ek dida-e-tar ki surat

dil jo sahra ke sarabon se mera ub gaya

yaad aai mujhe bhule hue ghar ki surat

aa ke nazdik mere jalne ka manzar dekho

dur se shoala bhi lagta hai sharar ki surat

aahaTen qadmon ki mohlat nahin detin warna

dekhte rahte hain raste bhi safar ki surat

kaun se ahd mein kholi hain ye aankhen hum ne

aib lagte hain 'suKHan' sab ke hunar ki surat