ba-juz tumhaare kisi se koi sawal nahin

ba-juz tumhāre kisī se koī savāl nahīñ

ki jaise saare zamāne se bol-chāl nahīñ

ye sochtā huuñ ki tū kyuuñ nazar nahīñ aatā

mirī nigāh nahīñ yā tirā jamāl nahīñ

tajāhul apnī jafāoñ pe aur mahshar meñ

ḳhudā ke sāmne kahte ho tum ḳhayāl nahīñ

ye kah ke jalve se behosh ho ga.e muusā

nigāh us se milā.ūñ mirī majāl nahīñ

maiñ har bahār-e-gulistāñ pe ġhaur kartā huuñ

jalā na ho mirā ghar aisā koī saal nahīñ

ḳhatā muaaf ki sarkār muñh pe kahtā huuñ

baġhair ā.īna kah lo mirī misāl nahīñ

maiñ chāndnī meñ bulātā to huuñ vo kah deñge

'qamar' tumheñ mirī rusvā.ī kā ḳhayāl nahīñ

ba-juz tumhaare kisi se koi sawal nahin

ki jaise sare zamane se bol-chaal nahin

ye sochta hun ki tu kyun nazar nahin aata

meri nigah nahin ya tera jamal nahin

tajahul apni jafaon pe aur mahshar mein

KHuda ke samne kahte ho tum KHayal nahin

ye kah ke jalwe se behosh ho gae musa

nigah us se milaun meri majal nahin

main har bahaar-e-gulistan pe ghaur karta hun

jala na ho mera ghar aisa koi sal nahin

KHata muaf ki sarkar munh pe kahta hun

baghair aaina kah lo meri misal nahin

main chandni mein bulata to hun wo kah denge

'qamar' tumhein meri ruswai ka KHayal nahin