ba-KHuda hain teri hindu bu-e-mai-KHwar aankhen

ba-ḳhudā haiñ tirī hindū bu-e-mai-ḳhvār āñkheñ

nashshe kī Dorī nahīñ pahneñ haiñ zunnār āñkheñ

nazr-e-dil māñgtī haiñ aap kī sarshār āñkheñ

'ain mastī meñ rahā kartī haiñ hoshiyār āñkheñ

mujh ko nazzāra hai us parda-nashīñ kā manzūr

kaash ban jaa.eñ mirī rauzan-e-dīvār āñkheñ

chashm-e-āhū se ġharaz thī na mujhe nargis se

tirī āñkhoñ se jo miltīñ na ye do-chār āñkheñ

chār-chashm is liye kahtā hai mujhe ik 'ālam

ki mirī āñkhoñ meñ phirtī haiñ tirī yaar āñkheñ

dekhte rahte haiñ ham raah tumhārī sāhab

aap aate nahīñ aa jaatī haiñ har baar āñkheñ

shoḳh-chashmī se chakāroñ ko vo dhamkātī haiñ

dekhnā ham se milānā na ḳhabar-dār āñkheñ

taak lete haiñ nazar-bāz haiñ ham bhī sāhab

dil churāyā hai churāte ho jo har baar āñkheñ

pyaar se maiñ ne jo dekhā to vo farmāte haiñ

dekhiye dekhiye hotī haiñ gunahgār āñkheñ

chuum lete haiñ vo ā.īne meñ āñkheñ apnī

lab masīhā.ī kareñge ki haiñ bīmār āñkheñ

chashm-e-baddūr hai kājal bhī to manzūr-e-nazar

kyuuñ nazar ho ga.ī kyuuñ ho ga.iiñ bīmār āñkheñ

ruḳh-e-sayyād jo dekhā hai to ab dekh ke gul

band kar lete haiñ murġhān-e-giraftār āñkheñ

ban ga.e panja-e-mizhgāñ bhī mirī dast-e-du'ā

dekh rakhtī haiñ na kuchh hasrat-e-dīdār āñkheñ

dast-e-vahshat meñ ġhazāloñ ko takā kartā huuñ

rāt-din pesh-e-nazar haiñ tirī ai yaar āñkheñ

ye mirā dāman-e-tar dāman-e-gulchīñ hogā

rang lā.eñgī abhī to mirī ḳhūñ-bār āñkheñ

murġh-e-dil us se kisī tarah nahīñ bach saktā

kahīñ shāhīn shikārī sī haiñ tayyār āñkheñ

chashm-e-maḳhmūr meñ saaqī kī ye kaifiyyat hai

nashsha mastoñ ke do-bālā hoñ jo hoñ chaar āñkheñ

chāhiye hazrat-e-mūsā ke liye jalva-e-tūr

tere dīdār kī haiñ apnī sazā-vār āñkheñ

āgara chhūT gayā 'mehr' to chunnār meñ bhī

DhūñDhā kartī haiñ vahī kūcha-o-bāzār āñkheñ

ba-KHuda hain teri hindu bu-e-mai-KHwar aankhen

nashshe ki Dori nahin pahnen hain zunnar aankhen

nazr-e-dil mangti hain aap ki sarshaar aankhen

'ain masti mein raha karti hain hoshiyar aankhen

mujh ko nazzara hai us parda-nashin ka manzur

kash ban jaen meri rauzan-e-diwar aankhen

chashm-e-ahu se gharaz thi na mujhe nargis se

teri aankhon se jo miltin na ye do-chaar aankhen

chaar-chashm is liye kahta hai mujhe ek 'alam

ki meri aankhon mein phirti hain teri yar aankhen

dekhte rahte hain hum rah tumhaari sahab

aap aate nahin aa jati hain har bar aankhen

shoKH-chashmi se chakaron ko wo dhamkati hain

dekhna hum se milana na KHabar-dar aankhen

tak lete hain nazar-baz hain hum bhi sahab

dil churaya hai churaate ho jo har bar aankhen

pyar se main ne jo dekha to wo farmate hain

dekhiye dekhiye hoti hain gunahgar aankhen

chum lete hain wo aaine mein aankhen apni

lab masihai karenge ki hain bimar aankhen

chashm-e-baddur hai kajal bhi to manzur-e-nazar

kyun nazar ho gai kyun ho gain bimar aankhen

ruKH-e-sayyaad jo dekha hai to ab dekh ke gul

band kar lete hain murghan-e-giraftar aankhen

ban gae panja-e-mizhgan bhi meri dast-e-du'a

dekh rakhti hain na kuchh hasrat-e-didar aankhen

dast-e-wahshat mein ghazalon ko taka karta hun

raat-din pesh-e-nazar hain teri ai yar aankhen

ye mera daman-e-tar daman-e-gulchin hoga

rang laengi abhi to meri KHun-bar aankhen

murgh-e-dil us se kisi tarah nahin bach sakta

kahin shahin shikari si hain tayyar aankhen

chashm-e-maKHmur mein saqi ki ye kaifiyyat hai

nashsha maston ke do-baala hon jo hon chaar aankhen

chahiye hazrat-e-musa ke liye jalwa-e-tur

tere didar ki hain apni saza-war aankhen

aagara chhuT gaya 'mehr' to chunnar mein bhi

DhunDha karti hain wahi kucha-o-bazar aankhen