ba-nam-e-ishq gham-e-motabar zaruri hai

ba-nām-e-ishq ġham-e-mo'tabar zarūrī hai

hayāt ke liye koī hunar zarūrī hai

kuchh aur ho na ho hāsil baqā-e-dil ke liye

ik iztirāb-e-musalsal magar zarūrī hai

nashāt-e-dīd jo manzūr hai to ai yaaro

nazar ke saath ḳhulūs-e-nazar zarūrī hai

bahut ġhalat hai tamannā-e-ḳhud-farāmoshī

vafūr-e-ishq meñ apnī ḳhabar zarūrī hai

ḳhyāl-e-zīnat-e-fasl-e-bahār se pahle

mizāj-dānī-e-barq-o-sharar zarūrī hai

kuchh ham bhī aap se ummīd-e-lutf rakhte haiñ

udhar bhī ek uchaTtī nazar zarūrī hai

chaman ko aur hasīñ-tar banānā hai 'manshā'

to rañg-e-kārī-e-ḳhūn-e-jigar zarūrī hai

ba-nam-e-ishq gham-e-mo'tabar zaruri hai

hayat ke liye koi hunar zaruri hai

kuchh aur ho na ho hasil baqa-e-dil ke liye

ek iztirab-e-musalsal magar zaruri hai

nashat-e-did jo manzur hai to ai yaro

nazar ke sath KHulus-e-nazar zaruri hai

bahut ghalat hai tamanna-e-KHud-faramoshi

wafur-e-ishq mein apni KHabar zaruri hai

KHyal-e-zinat-e-fasl-e-bahaar se pahle

mizaj-dani-e-barq-o-sharar zaruri hai

kuchh hum bhi aap se ummid-e-lutf rakhte hain

udhar bhi ek uchaTti nazar zaruri hai

chaman ko aur hasin-tar banana hai 'mansha'

to rang-e-kari-e-KHun-e-jigar zaruri hai