ba-nam-e-kucha-e-dildar gul barse ki sang aae

ba-nām-e-kūcha-e-dildār gul barse ki sañg aa.e

hañsā hai chāk-e-pairāhan na kyuuñ chehre pe rañg aa.e

bachāte phirte āḳhir kab talak dast-e-azīzāñ se

unhīñ ko sauñp kar ham to kulāh-e-nām-o-nañg aa.e

hañso mat ahl-e-dil apnī sī jaano bazm-e-ḳhūbāñ meñ

chale aa.e idhar ham bhī bahut jab dil se tañg aa.e

kahāñ sehn-e-chaman meñ baat kū-e-sar-faroshāñ kī

idhar se sāda-rū nikle udhar se lāla-rañg aa.e

karo 'majrūh' tab dār-o-rasan ke tazkire ham se

jab us qāmat ke saa.e meñ tumheñ jiine kā Dhañg aa.e

ba-nam-e-kucha-e-dildar gul barse ki sang aae

hansa hai chaak-e-pairahan na kyun chehre pe rang aae

bachate phirte aaKHir kab talak dast-e-azizan se

unhin ko saunp kar hum to kulah-e-nam-o-nang aae

hanso mat ahl-e-dil apni si jaano bazm-e-KHuban mein

chale aae idhar hum bhi bahut jab dil se tang aae

kahan sehn-e-chaman mein baat ku-e-sar-faroshan ki

idhar se sada-ru nikle udhar se lala-rang aae

karo 'majruh' tab dar-o-rasan ke tazkire hum se

jab us qamat ke sae mein tumhein jine ka Dhang aae