ba-nam-e-taqat koi ishaara nahin chalega

ba-nām-e-tāqat koī ishāra nahīñ chalegā

udaas nasloñ pe ab ijāra nahīñ chalegā

ham apnī dhartī se apnī har samt ḳhud talāsheñ

hamārī ḳhātir koī sitāra nahīñ chalegā

hayāt ab shām-e-ġham kī tashbīh ḳhud banegī

tumhārī zulfoñ kā isti.āra nahīñ chalegā

chalo saroñ kā ḳhirāj nok-e-sināñ ko baḳhsheñ

ki jaañ bachāne kā istiḳhāra nahīñ chalegā

hamāre jazbe baġhāvatoñ ko tarāshte haiñ

hamāre jazboñ pe bas tumhārā nahīñ chalegā

azal se qaa.em haiñ donoñ apnī zidoñ pe 'mohsin'

chalegā paanī magar kināra nahīñ chalegā

ba-nam-e-taqat koi ishaara nahin chalega

udas naslon pe ab ijara nahin chalega

hum apni dharti se apni har samt KHud talashen

hamari KHatir koi sitara nahin chalega

hayat ab sham-e-gham ki tashbih KHud banegi

tumhaari zulfon ka istiara nahin chalega

chalo saron ka KHiraj nok-e-sinan ko baKHshen

ki jaan bachane ka istiKHara nahin chalega

hamare jazbe baghawaton ko tarashte hain

hamare jazbon pe bas tumhaara nahin chalega

azal se qaem hain donon apni zidon pe 'mohsin'

chalega pani magar kinara nahin chalega