ba-qadr-e-zauq-e-sujud aastan nahin milta

ba-qadr-e-zauq-e-sujūd āstāñ nahīñ miltā

zamīñ mile to mile āsmāñ nahīñ miltā

kiyā hai shauq meñ tai sar se jāda-e-maqsūd

kisī ko mere qadam kā nishāñ nahīñ miltā

jaras kī aatī hai kānoñ meñ duur se āvāz

talāsh meñ huuñ magar kārvāñ nahīñ miltā

ajal ne qissa-e-ġham nā-tamām chhoḌ diyā

yahīñ se silsila-e-dāstāñ nahīñ miltā

niyāz-e-ishq ko dekh aur nāz-e-husn ko dekh

mirī jabīñ se tirā āstāñ nahīñ miltā

rahe qafas meñ to sayyād ke sitam dekhe

chaman meñ aa.e to ab āshiyāñ nahīñ miltā

nahīñ ki manzil-e-jānāñ hai be-nishāñ 'farruḳh'

vahāñ pahuñch ke ḳhud apnā nishāñ nahīñ miltā

ba-qadr-e-zauq-e-sujud aastan nahin milta

zamin mile to mile aasman nahin milta

kiya hai shauq mein tai sar se jada-e-maqsud

kisi ko mere qadam ka nishan nahin milta

jaras ki aati hai kanon mein dur se aawaz

talash mein hun magar karwan nahin milta

ajal ne qissa-e-gham na-tamam chhoD diya

yahin se silsila-e-dastan nahin milta

niyaz-e-ishq ko dekh aur naz-e-husn ko dekh

meri jabin se tera aastan nahin milta

rahe qafas mein to sayyaad ke sitam dekhe

chaman mein aae to ab aashiyan nahin milta

nahin ki manzil-e-jaanan hai be-nishan 'farruKH'

wahan pahunch ke KHud apna nishan nahin milta