ba-qaid-e-waqt ye muzhda suna raha hai koi

ba-qaid-e-vaqt ye muzhda sunā rahā hai koī

ki inqalāb ke parde meñ aa rahā hai koī

ḳhudī ko rāh-e-ḳhudā.ī pe lā rahā hai koī

abhī dimāġh-e-bashar aazmā rahā hai koī

jahāñ ḳharāba-e-hastī miTā rahā hai koī

vahīñ kahīñ na.ī duniyā banā rahā hai koī

abhī naqāb-kushā.ī-e-husn hai dushvār

vahī uThe hue parde uThā rahā hai koī

jo zehn meñ hai vo tasvīr ban nahīñ chuktī

banā banā ke hayūle miTā rahā hai koī

bhulā rahā hai kisī ko tū bar-binā-e-ma.āl

ye ġhaur kar ki bhulāyā bhī jā rahā hai koī

dil-e-fasurda kī bātoñ pe ye tabassum-e-nāz

kalī ko phuul banānā sikhā rahā hai koī

vafā kī daad hai kotāhī-e-vafā kī dalīl

maiñ jāntā huuñ ki himmat baḌhā rahā hai koī

hadīs-e-kohna hai rūdād-e-inqilāb-e-chaman

sunī huī sī kahānī sunā rahā hai koī

mirī vafāoñ kā hai e'tirāf mere ba.ad

ḳhoshā-nasīb mujhe kho ke pā rahā hai koī

hai apne saa.e se vahshat meñ kis qadar taskīñ

samajh rahā huuñ mire saath aa rahā hai koī

nasīb-e-zauq ho 'sīmāb' qismat-e-mūsā

hameñ bhī tuur kī jānib bulā rahā hai koī

ba-qaid-e-waqt ye muzhda suna raha hai koi

ki inqalab ke parde mein aa raha hai koi

KHudi ko rah-e-KHudai pe la raha hai koi

abhi dimagh-e-bashar aazma raha hai koi

jahan KHaraba-e-hasti miTa raha hai koi

wahin kahin nai duniya bana raha hai koi

abhi naqab-kushai-e-husn hai dushwar

wahi uThe hue parde uTha raha hai koi

jo zehn mein hai wo taswir ban nahin chukti

bana bana ke hayule miTa raha hai koi

bhula raha hai kisi ko tu bar-bina-e-maal

ye ghaur kar ki bhulaya bhi ja raha hai koi

dil-e-fasurda ki baaton pe ye tabassum-e-naz

kali ko phul banana sikha raha hai koi

wafa ki dad hai kotahi-e-wafa ki dalil

main jaanta hun ki himmat baDha raha hai koi

hadis-e-kohna hai rudad-e-inqilab-e-chaman

suni hui si kahani suna raha hai koi

meri wafaon ka hai e'tiraf mere baad

KHosha-nasib mujhe kho ke pa raha hai koi

hai apne sae se wahshat mein kis qadar taskin

samajh raha hun mere sath aa raha hai koi

nasib-e-zauq ho 'simab' qismat-e-musa

hamein bhi tur ki jaanib bula raha hai koi