ba-wasf-e-shauq bhi dil ka kaha nahin karte

ba-vasf-e-shauq bhī dil kā kahā nahīñ karte

faroġh-e-qāmat-o-ruḳh kī sanā nahīñ karte

shikast-e-ahd-e-sitam par yaqīn rakhte haiñ

ham intihā-e-sitam kā gilā nahīñ karte

kuchh is tarah se luTī hai matā-e-dīda-o-dil

ki ab kisī se bhī zikr-e-vafā nahīñ karte

isī liye haiñ sazāvār-e-jaur-e-barq-e-sitam

ki haqq-e-ḳhidmat-e-gulchīñ adā nahīñ karte

mazāq-e-kohkanī ho ki dasht-paimā.ī

jinheñ tumhārī talab ho vo kyā nahīñ karte

vo āshnā-e-ġham-e-kā.ināt kyā hoñge

jo ḳhud ko aap kā dard-āshnā nahīñ karte

ġham-e-habīb ġham-e-zindagī ġham-e-daurāñ

kisī maqām pe ham jī burā nahīñ karte

ba-wasf-e-shauq bhi dil ka kaha nahin karte

farogh-e-qamat-o-ruKH ki sana nahin karte

shikast-e-ahd-e-sitam par yaqin rakhte hain

hum intiha-e-sitam ka gila nahin karte

kuchh is tarah se luTi hai mata-e-dida-o-dil

ki ab kisi se bhi zikr-e-wafa nahin karte

isi liye hain sazawar-e-jaur-e-barq-e-sitam

ki haqq-e-KHidmat-e-gulchin ada nahin karte

mazaq-e-kohkani ho ki dasht-paimai

jinhen tumhaari talab ho wo kya nahin karte

wo aashna-e-gham-e-kainat kya honge

jo KHud ko aap ka dard-ashna nahin karte

gham-e-habib gham-e-zindagi gham-e-dauran

kisi maqam pe hum ji bura nahin karte