ba-zahir dekhte hain to ziyaada kaam karta hun

ba-zāhir dekhte haiñ to ziyāda kaam kartā huuñ

magar haq baat kuchh yuuñ hai ki thoḌā kaam kartā huuñ

ab aage ḳhud samajh jaao maiñ kaisā kaam kartā huuñ

jo koī bhī nahīñ kartā hai vaisā kaam kartā huuñ

mohabbat meñ mujhe bāteñ banānā to nahīñ aatā

kabhī mauqa mile mujh ko to sīdhā kaam kartā huuñ

karānā chāhtā huuñ is tarah apnā hī koī kaam

yahāñ har vaqt jo maiñ ye tumhārā kaam kartā huuñ

na.ī hai peshkash aur phir kiyā hai naam bhī tabdīl

haqīqat meñ magar ab bhī purānā kaam kartā huuñ

vo mere saath jo karte haiñ vaisā to nahīñ koī

vo apnā kaam karte haiñ maiñ apnā kaam kartā huuñ

magar ab log kahte haiñ bhalā ye bhī hai koī kaam

kabhī ye log kahte the ki achchhā kaam kartā huuñ

ab aisā bhī nahīñ hai jo milā vo kar liyā maiñ ne

mirā me.aar hai ik aur suthrā kaam kartā huuñ

unheñ vo chhoḌ dete haiñ jo kuchh bhī to nahīñ karte

maiñ phañs jaatā huuñ 'gul' utnā hī jitnā kaam kartā huuñ

ba-zahir dekhte hain to ziyaada kaam karta hun

magar haq baat kuchh yun hai ki thoDa kaam karta hun

ab aage KHud samajh jao main kaisa kaam karta hun

jo koi bhi nahin karta hai waisa kaam karta hun

mohabbat mein mujhe baaten banana to nahin aata

kabhi mauqa mile mujh ko to sidha kaam karta hun

karana chahta hun is tarah apna hi koi kaam

yahan har waqt jo main ye tumhaara kaam karta hun

nai hai peshkash aur phir kiya hai nam bhi tabdil

haqiqat mein magar ab bhi purana kaam karta hun

wo mere sath jo karte hain waisa to nahin koi

wo apna kaam karte hain main apna kaam karta hun

magar ab log kahte hain bhala ye bhi hai koi kaam

kabhi ye log kahte the ki achchha kaam karta hun

ab aisa bhi nahin hai jo mila wo kar liya main ne

mera mear hai ek aur suthra kaam karta hun

unhen wo chhoD dete hain jo kuchh bhi to nahin karte

main phans jata hun 'gul' utna hi jitna kaam karta hun