ba-wafa koi koi hota hai

bā-vafā koī koī hotā hai

maiñ bhī thā koī koī hotā hai

qadr kar merī qadr kar zālim

dil-jalā koī koī hotā hai

ibn-e-ādam ke rog bahutere

lā-davā koī koī hotā hai

kaun zālim nahīñ zamāne meñ

aap sā koī koī hotā hai

dil meñ kaahe na chor ghar karte

dar bhī vā koī koī hotā hai

jis tarah ham haiñ aap ke sarkār

ba-ḳhudā koī koī hotā hai

sab kā hotā hai dard koī na koī

dard kā koī koī hotā hai

aa.ina aap ā.ina-bīñ aap

dekhnā koī koī hotā hai

yuuñ to qātil haiñ an-ginat 'rāhīl'

āshnā koī koī hotā hai

ba-wafa koi koi hota hai

main bhi tha koi koi hota hai

qadr kar meri qadr kar zalim

dil-jala koi koi hota hai

ibn-e-adam ke rog bahutere

la-dawa koi koi hota hai

kaun zalim nahin zamane mein

aap sa koi koi hota hai

dil mein kahe na chor ghar karte

dar bhi wa koi koi hota hai

jis tarah hum hain aap ke sarkar

ba-KHuda koi koi hota hai

sab ka hota hai dard koi na koi

dard ka koi koi hota hai

aaina aap aaina-bin aap

dekhna koi koi hota hai

yun to qatil hain an-ginat 'rahil'

aashna koi koi hota hai