bab-e-rahmat pe dua girya-kunan ho jaise

bāb-e-rahmat pe duā girya-kunāñ ho jaise

gum-shuda beTe kī muztar koī maañ ho jaise

us kī mumtāz kī rūdād-e-mohabbat likh duuñ

aise kahtā hai koī shāh-jahāñ ho jaise

guftugū meñ vo halāvat vo amal meñ iḳhlās

us kī hastī pe farishte kā gumāñ ho jaise

us kī duzdīda-nigāhī ke haiñ sab hī ghāyal

koī sayyād liye tīr-o-kamāñ ho jaise

mujh ko urdu-e-muallā nahīñ aatī ab tak

tujh ko ye zo.am tire ghar kī zabāñ ho jaise

ham ko rakhtī hai nishāne pe siyāsat un kī

ghar jalāne pe ba-zid barq-e-tapāñ ho jaise

us ke aate hī sanam-ḳhānoñ ke but bol uThe

mashriqoñ meñ koī ejāz-e-bayāñ ho jaise

yuuñ tirī zulf kī ḳhushbū hai sar-e-shām uḌī

kashtī-e-fikr yam-e-fan meñ ravāñ ho jaise

tere ash.ār utar aate haiñ 'dā.em' dil meñ

haq-parastoñ ke liye saut-e-azāñ ho jaise

bab-e-rahmat pe dua girya-kunan ho jaise

gum-shuda beTe ki muztar koi man ho jaise

us ki mumtaz ki rudad-e-mohabbat likh dun

aise kahta hai koi shah-jahan ho jaise

guftugu mein wo halawat wo amal mein iKHlas

us ki hasti pe farishte ka guman ho jaise

us ki duzdida-nigahi ke hain sab hi ghayal

koi sayyaad liye tir-o-kaman ho jaise

mujh ko urdu-e-mualla nahin aati ab tak

tujh ko ye zoam tere ghar ki zaban ho jaise

hum ko rakhti hai nishane pe siyasat un ki

ghar jalane pe ba-zid barq-e-tapan ho jaise

us ke aate hi sanam-KHanon ke but bol uThe

mashriqon mein koi ejaz-e-bayan ho jaise

yun teri zulf ki KHushbu hai sar-e-sham uDi

kashti-e-fikr yam-e-fan mein rawan ho jaise

tere ashaar utar aate hain 'daem' dil mein

haq-paraston ke liye saut-e-azan ho jaise