baad-e-murdan ki bhi tadbir kiye jata hun

ba.ad-e-murdan kī bhī tadbīr kiye jaatā huuñ

apnī qabr aap hī ta.amīr kiye jaatā huuñ

chain mutlaq nahīñ paḌtā shab-e-hijrāñ meñ mujhe

sub.h tak nāla-e-shab-gīr kiye jaatā huuñ

afv par afv kī rezish hai udhar se har dam

aur maiñ taqsīr pe taqsīr kiye jaatā huuñ

us ke kūche meñ jo dekhegā karegā mujhe yaad

apnī sūrat kī maiñ tasvīr kiye jaatā huuñ

uTh ke tā-kūcha-e-lailā se na jaave ye kahīñ

paañv meñ qais ke zanjīr kiye jaatā huuñ

koī le jaa.e ise yā ki na le jaa.e pa maiñ

nāma-e-shauq kī tahrīr kiye jaatā huuñ

us kā kyā jurm mire hosh ga.e haiñ kaise

jo alam ġhair pe shamshīr kiye jaatā huuñ

pesh jaatī nahīñ yuuñ bhī mirī us se har-chand

sharr-o-makr-o-fan-o-tazvīr kiye jaatā huuñ

naqsh-e-hub chaal se nikal hai mirī is ḳhātir

maiñ parī-zādoñ kī tasḳhīr kiye jaatā huuñ

'mus.hafī' yaar tū suntā nahīñ aur vahshī sā

haal kī apne maiñ taqrīr kiye jaatā huuñ

baad-e-murdan ki bhi tadbir kiye jata hun

apni qabr aap hi tamir kiye jata hun

chain mutlaq nahin paDta shab-e-hijran mein mujhe

subh tak nala-e-shab-gir kiye jata hun

afw par afw ki rezish hai udhar se har dam

aur main taqsir pe taqsir kiye jata hun

us ke kuche mein jo dekhega karega mujhe yaad

apni surat ki main taswir kiye jata hun

uTh ke ta-kucha-e-laila se na jawe ye kahin

panw mein qais ke zanjir kiye jata hun

koi le jae ise ya ki na le jae pa main

nama-e-shauq ki tahrir kiye jata hun

us ka kya jurm mere hosh gae hain kaise

jo alam ghair pe shamshir kiye jata hun

pesh jati nahin yun bhi meri us se har-chand

sharr-o-makr-o-fan-o-tazwir kiye jata hun

naqsh-e-hub chaal se nikal hai meri is KHatir

main pari-zadon ki tasKHir kiye jata hun

'mushafi' yar tu sunta nahin aur wahshi sa

haal ki apne main taqrir kiye jata hun