baada-e-gul ko sab andoh-ruba kahte hain

bāda-e-gul ko sab andoh-rubā kahte haiñ

ashk-e-gul rañg meñ Dhal jaa.e to kyā kahte haiñ

fursat-e-bazm bhī mālūm ki arbāb-e-nazar

shola-e-sham.a ko ham dosh-e-sabā kahte haiñ

ye musalsal tirā paimāñ tirī paimāñ-shikanī

ham ise hāsil-e-paimān-e-vafā kahte haiñ

qasr-e-āzādi-e-insāñ hī sahī mai-ḳhāna

dar-e-mai-ḳhāna kī zanjīr ko kyā kahte haiñ

ye rah-e-ġham ke ḳham-o-pech ajab haiñ jin ko

ḳhush-nazar sāyā-e-gesu-e-rasā kahte haiñ

ishq ḳhud apnī jagah maz.har-e-anvār-e-ḳhudā

aql is soch meñ gum kis ko ḳhudā kahte haiñ

koī kis dil se bhalā un kā burā chāhegā

jo bhale log buroñ ko bhī bhalā kahte haiñ

dil-nashīñ tere sivā koī nahīñ koī nahīñ

kaun haiñ vo jo tujhe dil se judā kahte haiñ

yahī dīvāna jo phūloñ se bhī katrātā hai

kyā isī ko 'ravish'-e-ābla-pā kahte haiñ

baada-e-gul ko sab andoh-ruba kahte hain

ashk-e-gul rang mein Dhal jae to kya kahte hain

fursat-e-bazm bhi malum ki arbab-e-nazar

shola-e-shama ko hum dosh-e-saba kahte hain

ye musalsal tera paiman teri paiman-shikani

hum ise hasil-e-paiman-e-wafa kahte hain

qasr-e-azadi-e-insan hi sahi mai-KHana

dar-e-mai-KHana ki zanjir ko kya kahte hain

ye rah-e-gham ke KHam-o-pech ajab hain jin ko

KHush-nazar saya-e-gesu-e-rasa kahte hain

ishq KHud apni jagah mazhar-e-anwar-e-KHuda

aql is soch mein gum kis ko KHuda kahte hain

koi kis dil se bhala un ka bura chahega

jo bhale log buron ko bhi bhala kahte hain

dil-nashin tere siwa koi nahin koi nahin

kaun hain wo jo tujhe dil se juda kahte hain

yahi diwana jo phulon se bhi katraata hai

kya isi ko 'rawish'-e-abla-pa kahte hain