baada-e-KHum-e-KHana-e-tauhid ka mai-nosh hun

bāda-e-ḳhum-e-ḳhāna-e-tauhīd kā mai-nosh huuñ

chuur huuñ mastī meñ aisā be-ḳhud-o-mad.hosh huuñ

gird phirne de mujhe saaqī ye merā farz hai

misl-e-sāġhar daur meñ huuñ bāda-e-sar-josh huuñ

tarz-e-ḳhāmoshī mirī batlātī hai is raaz ko

huuñ navāsanj-e-haqīqat laakh maiñ ḳhāmosh huuñ

dardmand-e-ishq ho kar zabt kā ḳhūgar huuñ maiñ

sūrat-e-sīmāb ho kar paikar-e-ḳhāmosh huuñ

kis kī furqat vasl kis kā aur hai ma.ashūq kaun

'shād' maiñ is ālam-e-takvīñ kā ham-āġhosh huuñ

baada-e-KHum-e-KHana-e-tauhid ka mai-nosh hun

chur hun masti mein aisa be-KHud-o-madhosh hun

gird phirne de mujhe saqi ye mera farz hai

misl-e-saghar daur mein hun baada-e-sar-josh hun

tarz-e-KHamoshi meri batlati hai is raaz ko

hun nawasanj-e-haqiqat lakh main KHamosh hun

dardmand-e-ishq ho kar zabt ka KHugar hun main

surat-e-simab ho kar paikar-e-KHamosh hun

kis ki furqat wasl kis ka aur hai mashuq kaun

'shad' main is aalam-e-takwin ka ham-aghosh hun