baada-masti aa karamat ho ke maiKHane mein aa

bāda-mastī aa karāmat ho ke maiḳhāne meñ aa

chal parī shīshe se uḌ kar mere paimāne meñ aa

dūsrā aisā kahāñ ai dasht ḳhalvat kā maqām

apnī vīrānī ko le kar mere vīrāne meñ aa

vahshat-e-dil kī nahīñ tadbīr juz afsurdagī

tañgī-e-zindāñ kisī pahlū se dīvāne meñ aa

kar murattab kuchh na.e andāz se apnā bayāñ

marne vaale zindagī chāhe to afsāne meñ aa

chal nikal jaa.eñ idhar se apnī duniyā kī taraf

haañ tū ai tār-e-nafas tasbīh ke daane meñ aa

pel zor aape se bāhar ho ke jā.egā kahāñ

aadmī ban aadmī aa apne paimāne meñ aa

dāman-e-fānūs meñ ai sham.a ḳhud-dārī nahīñ

kisvat-e-nāmūs agar chāhe to parvāne meñ aa

ḳhatm karnā chāhtā huuñ pech-o-tāb-e-zindagī

yād-e-gesū zor-e-bāzū ban mire shāne meñ aa

ho chalī hai rasm-e-ahl-e-ka.aba 'nātiq' ab to aam

barhaman bhī mujh se kahtā hai ki but-ḳhāne meñ aa

baada-masti aa karamat ho ke maiKHane mein aa

chal pari shishe se uD kar mere paimane mein aa

dusra aisa kahan ai dasht KHalwat ka maqam

apni virani ko le kar mere virane mein aa

wahshat-e-dil ki nahin tadbir juz afsurdagi

tangi-e-zindan kisi pahlu se diwane mein aa

kar murattab kuchh nae andaz se apna bayan

marne wale zindagi chahe to afsane mein aa

chal nikal jaen idhar se apni duniya ki taraf

han tu ai tar-e-nafas tasbih ke dane mein aa

pel zor aape se bahar ho ke jaega kahan

aadmi ban aadmi aa apne paimane mein aa

daman-e-fanus mein ai shama KHud-dari nahin

kiswat-e-namus agar chahe to parwane mein aa

KHatm karna chahta hun pech-o-tab-e-zindagi

yaad-e-gesu zor-e-bazu ban mere shane mein aa

ho chali hai rasm-e-ahl-e-kaba 'natiq' ab to aam

barhaman bhi mujh se kahta hai ki but-KHane mein aa