baadal ki na be-nam nawazish ki taraf ja

bādal kī na be-nām navāzish kī taraf jā

is chhat se Tapaktī huī bārish kī taraf jā

in hoñToñ kī sūkhī huī papḌī ko nahīñ dekh

hoñToñ pe ubhartī huī ḳhvāhish kī taraf jā

ab tujh se bhī mujh ko koī ummīd nahīñ hai

beTe tū mirī āḳhirī ḳhvāhish kī taraf jā

apne liye logoñ meñ mohabbat ko nahīñ dekh

tū apne ḳhilāf apnī hī sāzish kī taraf jā

ro-ro ke tire apne tujhe qatl kareñge

jazbāt kī mat jhūTī numā.ish kī taraf jā

jā dekh tujhe kis tarah vo luuT rahā hai

ġhāfil kabhī dushman kī rihā.ish kī taraf jā

baadal ki na be-nam nawazish ki taraf ja

is chhat se Tapakti hui barish ki taraf ja

in honTon ki sukhi hui papDi ko nahin dekh

honTon pe ubharti hui KHwahish ki taraf ja

ab tujh se bhi mujh ko koi ummid nahin hai

beTe tu meri aaKHiri KHwahish ki taraf ja

apne liye logon mein mohabbat ko nahin dekh

tu apne KHilaf apni hi sazish ki taraf ja

ro-ro ke tere apne tujhe qatl karenge

jazbaat ki mat jhuTi numaish ki taraf ja

ja dekh tujhe kis tarah wo luT raha hai

ghafil kabhi dushman ki rihaish ki taraf ja