baadal umDe hain dhuan-dhaar ghaTa chhai hai

bādal umDe haiñ dhuāñ-dhār ghaTā chhā.ī hai

dhueñ tauba ke uḌāne ko bahār aa.ī hai

tā ki añgūr hare hoñ mire zaḳhm-e-dil ke

dhānī añgiyā mire dildār ne rañgvā.ī hai

tīra-baḳhtī se huī mujh ko ye ḳhiffat hāsil

dil-e-vahshat meñ suvaidā kī jagah paa.ī hai

ye chalan haiñ to tumheñ hashr se deñge tashbīh

log saffāk kaheñge baḌī rusvā.ī hai

maut ko ziist samajhtā huuñ maiñ betābī se

tirī furqat ne ye hālat mirī pahuñchā.ī hai

sabr hijrāñ meñ kare 'kaifī'-e-mahzūñ kab tak

āḳhir ai dost koī hadd-e-shakebā.ī hai

baadal umDe hain dhuan-dhaar ghaTa chhai hai

dhuen tauba ke uDane ko bahaar aai hai

ta ki angur hare hon mere zaKHm-e-dil ke

dhani angiya mere dildar ne rangwai hai

tira-baKHti se hui mujh ko ye KHiffat hasil

dil-e-wahshat mein suwaida ki jagah pai hai

ye chalan hain to tumhein hashr se denge tashbih

log saffak kahenge baDi ruswai hai

maut ko zist samajhta hun main betabi se

teri furqat ne ye haalat meri pahunchai hai

sabr hijran mein kare 'kaifi'-e-mahzun kab tak

aaKHir ai dost koi hadd-e-shakebai hai