bagh-e-alam mein jahan naKHl-e-hina lagta hai

bāġh-e-ālam meñ jahāñ naḳhl-e-hinā lagtā hai

dil-e-pur-ḳhūñ kā vahāñ haath patā lagtā hai

kyā taḌapnā dil-e-bismil kā bhalā lagtā hai

ki jab uchhle hai tire siine se jā lagtā hai

dil kahāñ sair tamāshe pe mirā lagtā hai

jī ke lag jaane se jiinā bhī burā lagtā hai

jo havādis se zamāne ke girā phir na uThā

naḳhl āñdhī kā kahīñ ukhḌā huā lagtā hai

dil lagāne kā mazā hai ki gazak meñ us ke

sab kabāboñ se namak dil pe sivā lagtā hai

na shab-e-hijr meñ lagtī hai zabāñ taalū se

aur na pahlū mirā bistar se zarā lagtā hai

haa.e mohtāj huā marham-e-zañgār kā tū

zaḳhm-e-dil zahr mujhe hañsnā tirā lagtā hai

āb-e-ḳhanjar jo hai zahrāb vafādārī ko

paanī shāyad ki sar-e-mulk fanā lagtā hai

qad-e-majnūñ koī pahle se chhaḌī bed kī hai

jab zarā jhuktā hai qad paañv se jā lagtā hai

zard zāhid hai to kyā khoT abhī hai dil meñ

'zauq' us zar ko kasauTī pe kasā lagtā hai

bagh-e-alam mein jahan naKHl-e-hina lagta hai

dil-e-pur-KHun ka wahan hath pata lagta hai

kya taDapna dil-e-bismil ka bhala lagta hai

ki jab uchhle hai tere sine se ja lagta hai

dil kahan sair tamashe pe mera lagta hai

ji ke lag jaane se jina bhi bura lagta hai

jo hawadis se zamane ke gira phir na uTha

naKHl aandhi ka kahin ukhDa hua lagta hai

dil lagane ka maza hai ki gazak mein us ke

sab kababon se namak dil pe siwa lagta hai

na shab-e-hijr mein lagti hai zaban talu se

aur na pahlu mera bistar se zara lagta hai

hae mohtaj hua marham-e-zangar ka tu

zaKHm-e-dil zahr mujhe hansna tera lagta hai

aab-e-KHanjar jo hai zahrab wafadari ko

pani shayad ki sar-e-mulk fana lagta hai

qad-e-majnun koi pahle se chhaDi bed ki hai

jab zara jhukta hai qad panw se ja lagta hai

zard zahid hai to kya khoT abhi hai dil mein

'zauq' us zar ko kasauTi pe kasa lagta hai