bagh-e-ulfat mein gul jo KHud-raw hai

bāġh-e-ulfat meñ gul jo ḳhud-rav hai

ḳhūn-e-bulbul kā rañg hai bū hai

āshiq-e-jāñ fidā-e-abrū hai

jo mah-e-īd sar-ba-zānū hai

fitna-e-hashr zulf-e-umr-e-darāz

par balā-e-siyāh gesū hai

terī abrū hai teġh ai saffāk

jauhar-e-teġh chīn-e-abrū hai

husn un kā agar hai sañgīñ dil

ishq apnā bhī saḳht baazū hai

leñ na shor-e-nushūr se karvaT

vo yahāñ ḳhvāb chaar pahlū hai

tol le sher ko mire hāsid

paas agar nazm kī tarāzū hai

kyuuñ na vo chashm-e-shauq meñ khaTke

ai parī-rū kamar tirī mū hai

us kā āshiq huā huuñ jis kī 'vaqār'

chashm aahū nigāh aahū hai

bagh-e-ulfat mein gul jo KHud-raw hai

KHun-e-bulbul ka rang hai bu hai

aashiq-e-jaan fida-e-abru hai

jo mah-e-id sar-ba-zanu hai

fitna-e-hashr zulf-e-umr-e-daraaz

par bala-e-siyah gesu hai

teri abru hai tegh ai saffak

jauhar-e-tegh chin-e-abru hai

husn un ka agar hai sangin dil

ishq apna bhi saKHt bazu hai

len na shor-e-nushur se karwaT

wo yahan KHwab chaar pahlu hai

tol le sher ko mere hasid

pas agar nazm ki taraazu hai

kyun na wo chashm-e-shauq mein khaTke

ai pari-ru kamar teri mu hai

us ka aashiq hua hun jis ki 'waqar'

chashm aahu nigah aahu hai