bagh tak kya karwan-e-husn-e-be-parwa gaya

baaġh tak kyā kārvān-e-husn-e-be-parvā gayā

bū pareshāñ hai ruḳh-e-gul ko pasīna aa gayā

merā sāġhar is tarah chhalkā ki dil ghabrā gayā

us pe saaqī kā ye farmānā ki terā kyā gayā

shauq kī duniyā nirālī hai ki rāh-e-shauq meñ

kārvāñ jitnā luTā zauq-e-ziyāñ baḌhtā gayā

be-kasī phir DhūñDhtī thī aasrā tūfān meñ

aap kā ism-e-girāmī mere lab par aa gayā

intihā pākīzgī kī us pe ye husn-e-libās

bū-e-gul ko jaama barg-e-tāza kā baḳhshā gayā

nāḳhudā sāhil kā sāthī thā use tūfāñ se kaam

nāḳhudā ko chhoḌ kar maiñ mauj tak tanhā gayā

chashm-e-fitrat hai bahār-e-ġhuncha-o-gul kī kafīl

abr uTThā jhuum kar barsā chaman lahrā gayā

bagh tak kya karwan-e-husn-e-be-parwa gaya

bu pareshan hai ruKH-e-gul ko pasina aa gaya

mera saghar is tarah chhalka ki dil ghabra gaya

us pe saqi ka ye farmana ki tera kya gaya

shauq ki duniya nirali hai ki rah-e-shauq mein

karwan jitna luTa zauq-e-ziyan baDhta gaya

be-kasi phir DhunDhti thi aasra tufan mein

aap ka ism-e-girami mere lab par aa gaya

intiha pakizgi ki us pe ye husn-e-libas

bu-e-gul ko jama barg-e-taza ka baKHsha gaya

naKHuda sahil ka sathi tha use tufan se kaam

naKHuda ko chhoD kar main mauj tak tanha gaya

chashm-e-fitrat hai bahaar-e-ghuncha-o-gul ki kafil

abr uTTha jhum kar barsa chaman lahra gaya