baham buland-o-past hain kaif-e-sharab ke

bāham buland-o-past haiñ kaif-e-sharāb ke

āñkhoñ meñ haiñ tulū-o-ġhurūb āftāb ke

piite haiñ surḳh-o-zard pyāle sharāb ke

kyā kyā haiñ auj-o-past meñ rañg āftāb ke

barsoñ se DhūñDhtā hai mazāmīñ sharāb ke

gardūñ ulaT rahā hai varaq āftāb ke

saaqī uñDel jaam subūhī subū kī ḳhair

mushtāq kab se haiñ lab-e-shab āftāb ke

uTThe vo dūd-e-dil ki falak ho gayā siyāh

gul ho ga.e charāġh mah-o-āftāb ke

likkhūñ jo un ke chehra-e-raushan kā vasf maiñ

paidā karūñ zabān-o-dahan āftāb ke

dho de sharāb se mire añgūr zaḳhm ko

tā-jalve baḳhsheñ zaḳhm-e-kuhan āftāb ke

kho degā dūd-e-āh falak kī barahnagī

Dālegī shaam muñh pe naqāb āftāb ke

ḳhālī kahāñ falak sitam-e-rozgār se

rakhtā hai dil pe daaġh mah-o-āftāb ke

jaane to do falak pe mire nāla-e-junūñ

purze uḌā.eñge varaq-e-āftāb ke

ai charḳh-e-pīr dekh liiñ aThkheliyāñ tirī

yaad aa ga.e hameñ bhī zamāne shabāb ke

paa.ī hai maiñ ne zaḳhm se tālīm-e-ḳhāmushī

goyā lab-e-sukūt dahan haiñ javāb ke

marhūm-e-ārzū haiñ sadā-e-shikast meñ

rah rah ga.e haiñ bhar ke phaphole habāb ke

kis e.atibār meñ nafas-e-chand ai 'nasīm'

shab har ke vāste ye tamāshe haiñ ḳhvāb ke

baham buland-o-past hain kaif-e-sharab ke

aankhon mein hain tulu-o-ghurub aaftab ke

pite hain surKH-o-zard pyale sharab ke

kya kya hain auj-o-past mein rang aaftab ke

barson se DhunDhta hai mazamin sharab ke

gardun ulaT raha hai waraq aaftab ke

saqi unDel jam subuhi subu ki KHair

mushtaq kab se hain lab-e-shab aaftab ke

uTThe wo dud-e-dil ki falak ho gaya siyah

gul ho gae charagh mah-o-aftab ke

likkhun jo un ke chehra-e-raushan ka wasf main

paida karun zaban-o-dahan aaftab ke

dho de sharab se mere angur zaKHm ko

ta-jalwe baKHshen zaKHm-e-kuhan aaftab ke

kho dega dud-e-ah falak ki barahnagi

Dalegi sham munh pe naqab aaftab ke

KHali kahan falak sitam-e-rozgar se

rakhta hai dil pe dagh mah-o-aftab ke

jaane to do falak pe mere nala-e-junun

purze uDaenge waraq-e-aftab ke

ai charKH-e-pir dekh lin aThkheliyan teri

yaad aa gae hamein bhi zamane shabab ke

pai hai main ne zaKHm se talim-e-KHamushi

goya lab-e-sukut dahan hain jawab ke

marhum-e-arzu hain sada-e-shikast mein

rah rah gae hain bhar ke phaphole habab ke

kis eatibar mein nafas-e-chand ai 'nasim'

shab har ke waste ye tamashe hain KHwab ke