bahar ki kya yaad aae ghar yaad nahin aata

bāhar kī kyā yaad aa.e ghar yaad nahīñ aatā

ab to apnā jism bhī aksar yaad nahīñ aatā

zaḳhmoñ kī saarī tahrīreñ yaksāñ lagtī haiñ

kis ne maarā pahlā patthar yaad nahīñ aatā

kahāñ uThāyā kahāñ jhukāyā kahāñ kaTāyā thā

itne kirdāroñ vaalā sar yaad nahīñ aatā

ruuh kahāñ kī jab jism-o-jāñ par ban aa.ī ho

koī qalandar koī payambar yaad nahīñ aatā

karte karte raqs Thahar jaatā huuñ ghabrā kar

jab bhī apne raqs kā mehvar yaad nahīñ aatā

apnī shān-e-nuzūl samajh meñ aane lagtī hai

jab koī apne se bartar yaad nahīñ aatā

qatre ne aap apnī shaḳhsiyyat hāsil kar lī

bāġhī ko ab mulk-e-samundar yaad nahīñ aatā

tujh ko to sab yaad hai jān-e-man 'farhat-ehsās'

tū hī kyoñ phir aage baḌh kar yaad nahīñ aatā

bahar ki kya yaad aae ghar yaad nahin aata

ab to apna jism bhi aksar yaad nahin aata

zaKHmon ki sari tahriren yaksan lagti hain

kis ne mara pahla patthar yaad nahin aata

kahan uThaya kahan jhukaya kahan kaTaya tha

itne kirdaron wala sar yaad nahin aata

ruh kahan ki jab jism-o-jaan par ban aai ho

koi qalandar koi payambar yaad nahin aata

karte karte raqs Thahar jata hun ghabra kar

jab bhi apne raqs ka mehwar yaad nahin aata

apni shan-e-nuzul samajh mein aane lagti hai

jab koi apne se bartar yaad nahin aata

qatre ne aap apni shaKHsiyyat hasil kar li

baghi ko ab mulk-e-samundar yaad nahin aata

tujh ko to sab yaad hai jaan-e-man 'farhat-ehsas'

tu hi kyon phir aage baDh kar yaad nahin aata