bais-e-asudgi hai hashr-samani mujhe

bā.is-e-āsūdgī hai hashr-sāmānī mujhe

raas aatī hai baḌī mushkil se āsānī mujhe

dekh kar terī ināyat aur tirā lutf-o-karam

khal rahī hai yaar apnī tañg-dāmānī mujhe

kar rahā hai zehn meñ gardish koī dhuñdlā sā aks

lag rahī hai us kī sūrat jaanī pahchānī mujhe

sochne kā zāviya maiñ ne badal Daalā hai dost

ab pareshānī nahīñ lagtī pareshānī mujhe

sauñp dī us ne mujhe apne badan kī saltanat

mil ga.ī ho muflisī meñ jaise sultānī mujhe

luqma-e-girdāb hone hī ko thā maiñ aur phir

daf.atan aa.ī nazar ik mauj-e-imkānī mujhe

aaj phir khulne lagī hai mujh pe ramz-e-kā.enāt

aaj phir hone lagī hai ḳhud pe hairānī mujhe

sochtā huuñ uulā misrā jab kabhī 'nāyāb' maiñ

ḳhud ko likhvātā hai baḌh kar misra-e-sānī mujhe

bais-e-asudgi hai hashr-samani mujhe

ras aati hai baDi mushkil se aasani mujhe

dekh kar teri inayat aur tera lutf-o-karam

khal rahi hai yar apni tang-damani mujhe

kar raha hai zehn mein gardish koi dhundla sa aks

lag rahi hai us ki surat jaani pahchani mujhe

sochne ka zawiya main ne badal Dala hai dost

ab pareshani nahin lagti pareshani mujhe

saunp di us ne mujhe apne badan ki saltanat

mil gai ho muflisi mein jaise sultani mujhe

luqma-e-girdab hone hi ko tha main aur phir

dafatan aai nazar ek mauj-e-imkani mujhe

aaj phir khulne lagi hai mujh pe ramz-e-kaenat

aaj phir hone lagi hai KHud pe hairani mujhe

sochta hun ula misra jab kabhi 'nayab' main

KHud ko likhwata hai baDh kar misra-e-sani mujhe