bais-e-tark-e-mulaqat batao to sahi

bā.is-e-tark-e-mulāqāt batāo to sahī

chāhne vaalā koī ham sā dikhāo to sahī

kaisī hotī hai mohabbat nahīñ ma.alūm tumheñ

ek do din kahīñ dil tum bhī lagāo to sahī

bevafā.ī kī hai tohmat chalo maanā ham ne

haañ bhalā ham se zarā aañkh milāo to sahī

jaan de dūñgā magar tum ko na jaane dūñgā

uTh ke pahlū se bhalā tum mire jaao to sahī

nahīñ milne kī jo marzī hai na milnā ham se

baat karnā ki na karnā magar aao to sahī

dekh lo jiite haiñ yā marte haiñ mushtāq sadā

apnī āvāz zarā un ko sunāo to sahī

har tarah bigḌe hue baiThe haiñ jaane ke liye

'āsmāñ' aaj koī baat banāo to sahī

bais-e-tark-e-mulaqat batao to sahi

chahne wala koi hum sa dikhao to sahi

kaisi hoti hai mohabbat nahin malum tumhein

ek do din kahin dil tum bhi lagao to sahi

bewafai ki hai tohmat chalo mana hum ne

han bhala hum se zara aankh milao to sahi

jaan de dunga magar tum ko na jaane dunga

uTh ke pahlu se bhala tum mere jao to sahi

nahin milne ki jo marzi hai na milna hum se

baat karna ki na karna magar aao to sahi

dekh lo jite hain ya marte hain mushtaq sada

apni aawaz zara un ko sunao to sahi

har tarah bigDe hue baiThe hain jaane ke liye

'asman' aaj koi baat banao to sahi