bani-e-be-dad bhi tum tum sitam-ijad bhi

bānī-e-be-dād bhī tum tum sitam-ījād bhī

sab gavārā hai agar sun lo mirī fariyād bhī

is qadar baḌhtā chalā jaatā hai dil kā iztirāb

bā.is-e-rāhat nahīñ hai ab tumhārī yaad bhī

aur hoñge jin ko shikva hai tirī bedād kā

ham vo haiñ jin ko ġhanīmat hai tirī bedād bhī

husn-e-sīrat hī ik aisā husn is duniyā meñ hai

dekh saktā hai jise har kor-e-mādar-zād bhī

ik vo aañsū jo sar-e-mizhgāñ nikal kar aa gayā

'ishq kī tafsīr bhī hai husn kī rūdād bhī

maiñ ne donoñ se nibāhī is tarah hañs-bol kar

bāġhbāñ bhī yaad kartā hai mujhe sayyād bhī

miT chukī thī ek muddat se tumhārī aarzū

rafta rafta miT rahī hai ab tumhārī yaad bhī

ham ne is ḳhūbī se likkhā hai fasāna 'ishq kā

log kahte haiñ isī ko husn kī rūdād bhī

ik faqat daane kī ḳhātir kaun hotā hai asiir

ham ko thā kuchh ehtirām-e-koshish-e-sayyād bhī

terī ḳhātir ye bhī 'sāhir' ne gavārā kar liyā

varna hotā hai ḳhushī se kyā koī barbād bhī

bani-e-be-dad bhi tum tum sitam-ijad bhi

sab gawara hai agar sun lo meri fariyaad bhi

is qadar baDhta chala jata hai dil ka iztirab

bais-e-rahat nahin hai ab tumhaari yaad bhi

aur honge jin ko shikwa hai teri bedad ka

hum wo hain jin ko ghanimat hai teri bedad bhi

husn-e-sirat hi ek aisa husn is duniya mein hai

dekh sakta hai jise har kor-e-madar-zad bhi

ek wo aansu jo sar-e-mizhgan nikal kar aa gaya

'ishq ki tafsir bhi hai husn ki rudad bhi

main ne donon se nibahi is tarah hans-bol kar

baghban bhi yaad karta hai mujhe sayyaad bhi

miT chuki thi ek muddat se tumhaari aarzu

rafta rafta miT rahi hai ab tumhaari yaad bhi

hum ne is KHubi se likkha hai fasana 'ishq ka

log kahte hain isi ko husn ki rudad bhi

ek faqat dane ki KHatir kaun hota hai asir

hum ko tha kuchh ehtiram-e-koshish-e-sayyaad bhi

teri KHatir ye bhi 'sahir' ne gawara kar liya

warna hota hai KHushi se kya koi barbaad bhi