bani-e-shahr-e-sitam mazlum kaise ho gaya

bānī-e-shahr-e-sitam mazlūm kaise ho gayā

kal jo mujrim thā vo ab ma.asūm kaise ho gayā

mohtasib sach sach batā ḳhalvat meñ kyā saudā huā

mudda.ī insāf se mahrūm kaise ho gayā

tā.ir-e-āzād zer-e-dām kaise aa gayā

vo ḳhayāl-e-muntashir manzūm kaise ho gayā

kyuuñ sharāfat ko himāqat kā diyā logoñ ne naam

fitna-e-shar ḳhair se mausūm kaise ho gayā

kis tarah ahl-e-junūñ ahl-e-ḳhirad samjhe ga.e

aql kā dīvāngī mafhūm kaise ho gayā

mujh se milnā to tujhe mushkil thā ai matlab ke yaar

ab mire ghar kā pata ma.alūm kaise ho gayā

kyā haiñ asbāb-e-zavāl-e-muslim-e-āshufta-hāl

kal jo hākim thā vo ab mahkūm kaise ho gayā

jo ye kahtā thā ki maiñ huuñ ik nishān-e-lā-zavāl

naqsh-e-fānī kī tarah ma.adūm kaise ho gayā

bol ai taa.ib miTā naqsh-e-suvaidā kis tarah

lauh-e-dil par lafz-e-haq marqūm kaise ho gayā

qaum kā qaa.id hai vo jo is kā ḳhidmat-gār hai

jis ne ḳhidmat hī na kī maḳhdūm kaise ho gayā

bhar diye auhām kis ne zehn-e-millat meñ 'jalāl'

chashma-e-āb-e-baqā masmūm kaise ho gayā

bani-e-shahr-e-sitam mazlum kaise ho gaya

kal jo mujrim tha wo ab masum kaise ho gaya

mohtasib sach sach bata KHalwat mein kya sauda hua

muddai insaf se mahrum kaise ho gaya

tair-e-azad zer-e-dam kaise aa gaya

wo KHayal-e-muntashir manzum kaise ho gaya

kyun sharafat ko himaqat ka diya logon ne nam

fitna-e-shar KHair se mausum kaise ho gaya

kis tarah ahl-e-junun ahl-e-KHirad samjhe gae

aql ka diwangi mafhum kaise ho gaya

mujh se milna to tujhe mushkil tha ai matlab ke yar

ab mere ghar ka pata malum kaise ho gaya

kya hain asbab-e-zawal-e-muslim-e-ashufta-haal

kal jo hakim tha wo ab mahkum kaise ho gaya

jo ye kahta tha ki main hun ek nishan-e-la-zawal

naqsh-e-fani ki tarah madum kaise ho gaya

bol ai taib miTa naqsh-e-suwaida kis tarah

lauh-e-dil par lafz-e-haq marqum kaise ho gaya

qaum ka qaid hai wo jo is ka KHidmat-gar hai

jis ne KHidmat hi na ki maKHdum kaise ho gaya

bhar diye auham kis ne zehn-e-millat mein 'jalal'

chashma-e-ab-e-baqa masmum kaise ho gaya