baqi jahan mein qais na farhad rah gaya

baaqī jahāñ meñ qais na farhād rah gayā

afsāna āshiqoñ kā faqat yaad rah gayā

ye saḳht-jāñ to qatl se nāshād rah gayā

ḳhanjar chalā to bāzū-e-jallād rah gayā

pābandiyoñ ne ishq kī bekas rakhā mujhe

maiñ sau asīriyoñ meñ bhī āzād rah gayā

chashm-e-sanam ne yuuñ to bigāḌe hazār ghar

ik kā'ba chand roz ko ābād rah gayā

mahshar meñ jā-e-shikva kiyā shukr yaar kā

jo bhūlnā thā mujh ko vahī yaad rah gayā

un kī to ban paḌī ki lagī jaan muft haath

terī girah meñ kyā dil-e-nāshād rah gayā

pur-nūr ho rahegā ye zulmat-kada agar

dil meñ butoñ kā shauq-e-ḳhudā-dād rah gayā

yuuñ aañkh un kī kar ke ishāra palaT ga.ī

goyā ki lab se ho ke kuchh irshād rah gayā

nāseh kā jī chalā thā hamārī tarah magar

ulfat kī dekh dekh ke uftād rah gayā

haiñ tere dil meñ sab ke Thikāne bure bhale

maiñ ḳhānumāñ-ḳharāb hī barbād rah gayā

vo din ga.e ki thī mire siine meñ kuchh ḳharāsh

ab dil kahāñ hai dil kā nishāñ yaad rah gayā

sūrat ko terī dekh ke khiñchtī hai jān-e-ḳhalq

dil apnā thaam thaam ke bahzād rah gayā

ai 'dāġh' dil hī dil meñ ghule zabt-e-ishq se

afsos shauq-e-nāl-o-fariyād rah gayā

baqi jahan mein qais na farhad rah gaya

afsana aashiqon ka faqat yaad rah gaya

ye saKHt-jaan to qatl se nashad rah gaya

KHanjar chala to bazu-e-jallad rah gaya

pabandiyon ne ishq ki bekas rakha mujhe

main sau asiriyon mein bhi aazad rah gaya

chashm-e-sanam ne yun to bigaDe hazar ghar

ek ka'ba chand roz ko aabaad rah gaya

mahshar mein ja-e-shikwa kiya shukr yar ka

jo bhulna tha mujh ko wahi yaad rah gaya

un ki to ban paDi ki lagi jaan muft hath

teri girah mein kya dil-e-nashad rah gaya

pur-nur ho rahega ye zulmat-kada agar

dil mein buton ka shauq-e-KHuda-dad rah gaya

yun aankh un ki kar ke ishaara palaT gai

goya ki lab se ho ke kuchh irshad rah gaya

naseh ka ji chala tha hamari tarah magar

ulfat ki dekh dekh ke uftad rah gaya

hain tere dil mein sab ke Thikane bure bhale

main KHanuman-KHarab hi barbaad rah gaya

wo din gae ki thi mere sine mein kuchh KHarash

ab dil kahan hai dil ka nishan yaad rah gaya

surat ko teri dekh ke khinchti hai jaan-e-KHalq

dil apna tham tham ke bahzad rah gaya

ai 'dagh' dil hi dil mein ghule zabt-e-ishq se

afsos shauq-e-nal-o-fariyaad rah gaya