bar-ha dil ko main samjha ke kaha kya kya kuchh

bār-hā dil ko maiñ samjhā ke kahā kyā kyā kuchh

na sunā aur khoyā mujh se mirā kyā kyā kuchh

izzat-o-ābrū o hurmat o diin o īmāñ

ro.uuñ kis kis ko maiñ yaaro ki gayā kyā kyā kuchh

sabr o ārām kahūñ yā ki maiñ ab hosh-o-havās

ho gayā us kī judā.ī meñ judā kyā kyā kuchh

ishq kis zaat kā aqrab hai ki lagte hī niish

dil ke saath āñkhoñ se paanī ho bahā kyā kyā kuchh

sāda-rūī ne to khoyā dil o diiñ se dekheñ

ḳhat ke aane meñ hai qismat kā likhā kyā kyā kuchh

daḳhl kyā rāh-e-mohabbat meñ niko-nāmī ko

aayā is kūche meñ jo un ne sunā kyā kyā kuchh

vālih-o-shefta o zār-o-hazīn o majnūñ

apne āshiq ko kal us ne na kahā kyā kyā kuchh

girya-e-shīsha kabhī thā to kabhī ḳhanda-e-jām

saaqī is daur meñ tere na huā kyā kyā kuchh

ġhurra mat ho jo zamāne se tirī ban aa.ī

thā vo kyā kyā ki na bigḌā na banā kyā kyā kuchh

shādī aane kī na kar yaar na jaane kā ġham

aayā kyā kyā na kuchh is jā na gayā kyā kyā kuchh

siina qānūn o ġhinā naala o dil hai mizrāb

nikle hai sāz-e-mohabbat se sadā kyā kyā kuchh

dosto haq meñ taraqqī o tanazzul apne

kyā kaheñ ham ko zamāne se huā kyā kyā kuchh

zo.af o nā-tāqatī o sustī o a.azā-shikanī

ek ghanTe meñ javānī ke baḌhā kyā kyā kuchh

sair kī qudarat-e-ḳhāliq kī butāñ meñ 'saudā'

musht bhar ḳhaak meñ jalva hai bhalā kyā kyā kuchh

bar-ha dil ko main samjha ke kaha kya kya kuchh

na suna aur khoya mujh se mera kya kya kuchh

izzat-o-abru o hurmat o din o iman

roun kis kis ko main yaro ki gaya kya kya kuchh

sabr o aaram kahun ya ki main ab hosh-o-hawas

ho gaya us ki judai mein juda kya kya kuchh

ishq kis zat ka aqrab hai ki lagte hi nish

dil ke sath aankhon se pani ho baha kya kya kuchh

sada-rui ne to khoya dil o din se dekhen

KHat ke aane mein hai qismat ka likha kya kya kuchh

daKHl kya rah-e-mohabbat mein niko-nami ko

aaya is kuche mein jo un ne suna kya kya kuchh

walih-o-shefta o zar-o-hazin o majnun

apne aashiq ko kal us ne na kaha kya kya kuchh

girya-e-shisha kabhi tha to kabhi KHanda-e-jam

saqi is daur mein tere na hua kya kya kuchh

ghurra mat ho jo zamane se teri ban aai

tha wo kya kya ki na bigDa na bana kya kya kuchh

shadi aane ki na kar yar na jaane ka gham

aaya kya kya na kuchh is ja na gaya kya kya kuchh

sina qanun o ghina nala o dil hai mizrab

nikle hai saz-e-mohabbat se sada kya kya kuchh

dosto haq mein taraqqi o tanazzul apne

kya kahen hum ko zamane se hua kya kya kuchh

zoaf o na-taqati o susti o aaza-shikani

ek ghanTe mein jawani ke baDha kya kya kuchh

sair ki qudarat-e-KHaliq ki butan mein 'sauda'

musht bhar KHak mein jalwa hai bhala kya kya kuchh