baat aisi bhi koi nahin ki mohabbat bahut ziyaada hai

baat aisī bhī koī nahīñ ki mohabbat bahut ziyāda hai

lekin ham donoñ se us kī tāqat bahut ziyāda hai

aap ke pīchhe pīchhe phirne se to rahe is umr meñ ham

raah pe aa baiThe haiñ ye bhī ġhanīmat bahut ziyāda hai

ishq udāsī ke paiġhām to laatā rahtā hai din raat

lekin ham ko ḳhush rahne kī aadat bahut ziyāda hai

kaam to kaafī rahtā hai lekin karnā hai kis ne yahāñ

be-shak roz idhar aa niklo fursat bahut ziyāda hai

kyā kuchh ho na sakā ham se aur hone vaalā hai kyā kuchh

hasrat bhī kaafī hai lekin hairat bahut ziyāda hai

sair hī karke aa jā.eñge phir bāzār-e-tamāshā kī

jis shai ko bhī haath lagā.eñ qīmat bahut ziyāda hai

us kī tavajjoh hāsil kī aur biich meñ sab kuchh chhoḌ diyā

hikmat jitnī bhī ho is meñ himāqat bahut zyāda hai

ishq hai kis ko yaad ki ham to Darte hī rahte haiñ sadā

husn vo jaisā bhī hai us kī dahshat bahut zyāda hai

ek chiiz jo apnī rasā.ī se bāhar hai kahīñ 'zafar'

sach pūchho to is kī hameñ zarūrat bahut zyāda hai

baat aisi bhi koi nahin ki mohabbat bahut ziyaada hai

lekin hum donon se us ki taqat bahut ziyaada hai

aap ke pichhe pichhe phirne se to rahe is umr mein hum

rah pe aa baiThe hain ye bhi ghanimat bahut ziyaada hai

ishq udasi ke paigham to lata rahta hai din raat

lekin hum ko KHush rahne ki aadat bahut ziyaada hai

kaam to kafi rahta hai lekin karna hai kis ne yahan

be-shak roz idhar aa niklo fursat bahut ziyaada hai

kya kuchh ho na saka hum se aur hone wala hai kya kuchh

hasrat bhi kafi hai lekin hairat bahut ziyaada hai

sair hi karke aa jaenge phir bazar-e-tamasha ki

jis shai ko bhi hath lagaen qimat bahut ziyaada hai

us ki tawajjoh hasil ki aur bich mein sab kuchh chhoD diya

hikmat jitni bhi ho is mein himaqat bahut zyaada hai

ishq hai kis ko yaad ki hum to Darte hi rahte hain sada

husn wo jaisa bhi hai us ki dahshat bahut zyaada hai

ek chiz jo apni rasai se bahar hai kahin 'zafar'

sach puchho to is ki hamein zarurat bahut zyaada hai