baat bhi un se kar nahin aati

baat bhī un se kar nahīñ aatī

aañkh bhī apnī bhar nahīñ aatī

maut aatī hai dahr meñ sab ko

āshiqoñ ko magar nahīñ aatī

jaan to apnī aa ga.ī lab par

koī un kī ḳhabar nahīñ aatī

mai se bhī ġham ġhalat nahīñ hotā

tab.a ab mauj par nahīñ aatī

nā-umīdī kī ab ye sūrat hai

koī ummīd bar nahīñ aatī

nāma-bar kī bhī ho ḳhabar yā-rab

koī us kī ḳhabar nahīñ aatī

jo duā sū-e-arsh jaatī hai

ho ke phir bā-asar nahīñ aatī

kis tavaqqo pe ham ji.eñ 'rahbar'

ik tamanna bhī bar nahīñ aatī

baat bhi un se kar nahin aati

aankh bhi apni bhar nahin aati

maut aati hai dahr mein sab ko

aashiqon ko magar nahin aati

jaan to apni aa gai lab par

koi un ki KHabar nahin aati

mai se bhi gham ghalat nahin hota

taba ab mauj par nahin aati

na-umidi ki ab ye surat hai

koi ummid bar nahin aati

nama-bar ki bhi ho KHabar ya-rab

koi us ki KHabar nahin aati

jo dua su-e-arsh jati hai

ho ke phir ba-asar nahin aati

kis tawaqqo pe hum jien 'rahbar'

ek tamanna bhi bar nahin aati