baat dil ko mere lagi nahin hai

baat dil ko mire lagī nahīñ hai

mere bhaa.ī ye shā.erī nahīñ hai

jāntī hai mire charāġh kī lau

kaun se ghar meñ raushnī nahīñ hai

vo ta.alluq bhī mustaqil nahīñ thā

ye mohabbat bhī dā.imī nahīñ hai

maiñ jo qissa sunā chukā to khulā

koī dīvār boltī nahīñ hai

dekhne vaalī aañkh bhī to ho

kaun dariyā meñ jal-parī nahīñ hai

buzdilā chhup ke vaar kartā hai

tujh ko tahzīb-e-dushmanī nahīñ hai

kyā karūñ is bahisht ko jis meñ

ek botal sharāb kī nahīñ hai

tujh se milnā bhī hai nahīñ bhī mujhe

aur tabī.at ulajh rahī nahīñ hai

kaun se shahr ke charāġh ho tum

tum meñ dam bhar kī raushnī nahīñ hai

jis kā charchā hai shahr meñ 'āmī'

vo ġhazal to abhī kahī nahīñ hai

baat dil ko mere lagi nahin hai

mere bhai ye shaeri nahin hai

jaanti hai mere charagh ki lau

kaun se ghar mein raushni nahin hai

wo talluq bhi mustaqil nahin tha

ye mohabbat bhi daimi nahin hai

main jo qissa suna chuka to khula

koi diwar bolti nahin hai

dekhne wali aankh bhi to ho

kaun dariya mein jal-pari nahin hai

buzdila chhup ke war karta hai

tujh ko tahzib-e-dushmani nahin hai

kya karun is bahisht ko jis mein

ek botal sharab ki nahin hai

tujh se milna bhi hai nahin bhi mujhe

aur tabiat ulajh rahi nahin hai

kaun se shahr ke charagh ho tum

tum mein dam bhar ki raushni nahin hai

jis ka charcha hai shahr mein 'ami'

wo ghazal to abhi kahi nahin hai