baat karni hai to aa ab fikr-o-fan ki baat kar

baat karnī hai to aa ab fikr-o-fan kī baat kar

ham-navā ai ham-nafas ham se suḳhan kī baat kar

baaġh kī bulbul kī ġhunchoñ kī chaman kī baat kar

is zamīñ kī baat kar tū is gagan kī baat kar

jism par nashtar ke haiñ gar zaḳhm to bhar jā.eñge

ruuh tak zaḳhmī ho jis se us chubhan kī baat kar

sinf-e-nāzuk ko agar denī hai izzat dil se de

dar-guzar kar de ḳhatā.eñ husn-e-zan kī baat kar

apne dāman meñ sameTe ashk aaheñ siskiyāñ

bin-biyāhī laḌkiyoñ kī is ghuTan kī baat kar

ho darindoñ kī nazar jis par burī sub.h-o-masā

phuul sī bachchī ke khulte bāñkpan kī baat kar

haiñ vahī hālāt to kaise kaheñ kyoñ kar kaheñ

titliyoñ kī fasl-e-gul lāla-badan kī baat kar

muflisī ne rakh diyā hai chīthaḌoñ meñ baañT kar

ab ridā kī baat karnā pairahan kī baat kar

aadmī ko aadmī se is qadar nafrat hai kyoñ

buġhz kiina dushmanī ġhībat jalan kī baat kar

TuuT kar chāhe mujhe aur jaan tak qurbāñ kare

mere is dilbar kī is bāñke sajan kī baat kar

jab zarūrat ho junūñ kī baat kar 'shahnāz' se

zindagī kī baat kar dār-o-rasan kī baat kar

baat karni hai to aa ab fikr-o-fan ki baat kar

ham-nawa ai ham-nafas hum se suKHan ki baat kar

bagh ki bulbul ki ghunchon ki chaman ki baat kar

is zamin ki baat kar tu is gagan ki baat kar

jism par nashtar ke hain gar zaKHm to bhar jaenge

ruh tak zaKHmi ho jis se us chubhan ki baat kar

sinf-e-nazuk ko agar deni hai izzat dil se de

dar-guzar kar de KHataen husn-e-zan ki baat kar

apne daman mein sameTe ashk aahen siskiyan

bin-biyahi laDkiyon ki is ghuTan ki baat kar

ho darindon ki nazar jis par buri subh-o-masa

phul si bachchi ke khulte bankpan ki baat kar

hain wahi haalat to kaise kahen kyon kar kahen

titliyon ki fasl-e-gul lala-badan ki baat kar

muflisi ne rakh diya hai chithaDon mein banT kar

ab rida ki baat karna pairahan ki baat kar

aadmi ko aadmi se is qadar nafrat hai kyon

bughz kina dushmani ghibat jalan ki baat kar

TuT kar chahe mujhe aur jaan tak qurban kare

mere is dilbar ki is banke sajan ki baat kar

jab zarurat ho junun ki baat kar 'shahnaz' se

zindagi ki baat kar dar-o-rasan ki baat kar