baat kuchh hosh ki nahin malum

baat kuchh hosh kī nahīñ ma.alūm

vaj.h-e-dīvāngī nahīñ ma.alūm

ye zamāna hai gosh-bar-āvāz

kis ne āvāz dī nahīñ ma.alūm

apnī manzil pe aa gayā huuñ magar

kis ne kī rahbarī nahīñ ma.alūm

uf vo un kā tasavvur-e-rangīñ

kab sahar ho ga.ī nahīñ ma.alūm

ishq kī be-ḳhudī samajhtā huuñ

husn kī be-ruḳhī nahīñ ma.alūm

ziist ke pech-o-ḳham se vāqif huuñ

zulf kī barhamī nahīñ ma.alūm

maiñ añdheroñ meñ kho gayā huuñ 'muhib'

hai kahāñ raushnī nahīñ ma.alūm

baat kuchh hosh ki nahin malum

wajh-e-diwangi nahin malum

ye zamana hai gosh-bar-awaz

kis ne aawaz di nahin malum

apni manzil pe aa gaya hun magar

kis ne ki rahbari nahin malum

uf wo un ka tasawwur-e-rangin

kab sahar ho gai nahin malum

ishq ki be-KHudi samajhta hun

husn ki be-ruKHi nahin malum

zist ke pech-o-KHam se waqif hun

zulf ki barhami nahin malum

main andheron mein kho gaya hun 'muhib'

hai kahan raushni nahin malum