baat kya jaane aa gai dil mein

baat kyā jaane aa ga.ī dil meñ

maañ mirā jī nahīñ lagā mill meñ

yaar phūloñ se ḳhūbsūrat hai

ya.anī kāñTā paḌā rahe dil meñ

ham ko kiiḌā banā ke dhartī par

rizq mahfūz kar diyā sil meñ

paanī har chiiz kā jad-e-amjad

rāz-e-kun rakh diyā gayā gil meñ

vaise mahfil to saarī apnī hai

koī apnā nahīñ hai mahfil meñ

merī āñkhoñ meñ ab bhī chaltī haiñ

bhūle bisre dinoñ kī sab filmeñ

terī āvāz par maiñ niklā thā

zindagī chhup ga.ī kahāñ bil meñ

chhā gayā hai chahār-sū sakta

yaar niklā hai surḳh mahmil meñ

aaj phir yaar hai hamārī chup

jān-e-‘rāshid’ hai aaj mahfil meñ

baat kya jaane aa gai dil mein

man mera ji nahin laga mill mein

yar phulon se KHubsurat hai

yani kanTa paDa rahe dil mein

hum ko kiDa bana ke dharti par

rizq mahfuz kar diya sil mein

pani har chiz ka jad-e-amjad

raaz-e-kun rakh diya gaya gil mein

waise mahfil to sari apni hai

koi apna nahin hai mahfil mein

meri aankhon mein ab bhi chalti hain

bhule bisre dinon ki sab filmen

teri aawaz par main nikla tha

zindagi chhup gai kahan bil mein

chha gaya hai chahaar-su sakta

yar nikla hai surKH mahmil mein

aaj phir yar hai hamari chup

jaan-e-‘rashid’ hai aaj mahfil mein