baatil-o-na-haq se ummid-e-karam karte rahe

bātil-o-nā-haq se ummīd-e-karam karte rahe

jo na karnā thā hameñ vo kaam ham karte rahe

zabt kar sakte the āḳhir zabt ham karte rahe

kaam thā jin kā sitam karnā sitam karte rahe

zindagī-bhar muskurā.e be-sabab ham dosto

zindagī-bhar ziist kī talḳhī ko kam karte rahe

ai qazā tū der se aa.ī magar ḳhush-āmdīd

umr-bhar ham yaad tujh ko dam-ba-dam karte rahe

umr-bhar ham ne kiyā hai dūsroñ kā ehtirām

ya.anī ḳhud ko umr-bhar ham mohtaram karte rahe

umr paḌhne likhne kī ġhaflat meñ guzrī aur phir

zindagī-bhar haath armān-e-qalam karte rahe

kyā namāzeñ haiñ hamārī kyā hamārī bandagī

khoT niyyat meñ rahā aur sar ko ḳham karte rahe

baatil-o-na-haq se ummid-e-karam karte rahe

jo na karna tha hamein wo kaam hum karte rahe

zabt kar sakte the aaKHir zabt hum karte rahe

kaam tha jin ka sitam karna sitam karte rahe

zindagi-bhar muskurae be-sabab hum dosto

zindagi-bhar zist ki talKHi ko kam karte rahe

ai qaza tu der se aai magar KHush-amdid

umr-bhar hum yaad tujh ko dam-ba-dam karte rahe

umr-bhar hum ne kiya hai dusron ka ehtiram

yani KHud ko umr-bhar hum mohtaram karte rahe

umr paDhne likhne ki ghaflat mein guzri aur phir

zindagi-bhar hath arman-e-qalam karte rahe

kya namazen hain hamari kya hamari bandagi

khoT niyyat mein raha aur sar ko KHam karte rahe