baaton se sitamgar mujhe bahlata raha wo

bātoñ se sitamgar mujhe bahlātā rahā vo

milne meñ to har baar hī apnoñ sā lagā vo

kyā kyā mirī ḳhvāhish ke mazāq us ne uḌaa.e

kyā kyā nahīñ detā rahā jiine kī sazā vo

jab bhī kabhī us ne mujhe maqtal meñ sajāyā

mujh ko to bas apnā hī taraf-dār lagā vo

jis ne bhī mirā saath diyā rāh-e-vafā meñ

ik shaḳhs kī dahshat se mujhe chhoḌ gayā vo

aisā kabhī dekhā na sunā jaur kā ḳhūgar

har baar jafā kar ke bhī hotā thā ḳhafā vo

kartā thā muravvat meñ kabhī mashq-e-sitam bhī

kahtā thā mire ḳhuuñ ko kabhī rañg-e-hinā vo

baaton se sitamgar mujhe bahlata raha wo

milne mein to har bar hi apnon sa laga wo

kya kya meri KHwahish ke mazaq us ne uDae

kya kya nahin deta raha jine ki saza wo

jab bhi kabhi us ne mujhe maqtal mein sajaya

mujh ko to bas apna hi taraf-dar laga wo

jis ne bhi mera sath diya rah-e-wafa mein

ek shaKHs ki dahshat se mujhe chhoD gaya wo

aisa kabhi dekha na suna jaur ka KHugar

har bar jafa kar ke bhi hota tha KHafa wo

karta tha murawwat mein kabhi mashq-e-sitam bhi

kahta tha mere KHun ko kabhi rang-e-hina wo