bazar-e-zindagi mein jame kaise apna rang

bāzār-e-zindagī meñ jame kaise apnā rañg

haiñ mushtarī ke taur na byopārīyoñ ke Dhang

muddat se phir rahā huuñ ḳhud apnī talāsh meñ

har lamha laḌ rahā huuñ ḳhud apne ḳhilāf jang

ik naam lauh-e-zehn se miTtā nahīñ hai kyuuñ

kyuuñ āḳhir is pe vaqt chaḌhātā nahīñ hai rañg

us se alag bhī 'umr to kaT hī ga.ī magar

ek ek pal ke bojh se dukhtā hai añg añg

shāḳh-e-nihāl-e-zehn pe ḳhvāboñ ke phuul the

hotā na apnā dast-e-junūñ kaash zer-e-sang

āvāz ke hisār meñ dil ab bhī qaid hai

māñge hai ab bhī pairahan-e-lafz har umang

kuchh tajraba bhī ab to zamāne kā ho gayā

kuchh dil ke bachpane se bhī ham aa ga.e haiñ tañg

kūcha-ba-kūcha phirte haiñ ab is tarah 'bashar'

bhaTke hai jaise haath se TuuTī huī patang

bazar-e-zindagi mein jame kaise apna rang

hain mushtari ke taur na byopariyon ke Dhang

muddat se phir raha hun KHud apni talash mein

har lamha laD raha hun KHud apne KHilaf jang

ek nam lauh-e-zehn se miTta nahin hai kyun

kyun aaKHir is pe waqt chaDhata nahin hai rang

us se alag bhi 'umr to kaT hi gai magar

ek ek pal ke bojh se dukhta hai ang ang

shaKH-e-nihaal-e-zehn pe KHwabon ke phul the

hota na apna dast-e-junun kash zer-e-sang

aawaz ke hisar mein dil ab bhi qaid hai

mange hai ab bhi pairahan-e-lafz har umang

kuchh tajraba bhi ab to zamane ka ho gaya

kuchh dil ke bachpane se bhi hum aa gae hain tang

kucha-ba-kucha phirte hain ab is tarah 'bashar'

bhaTke hai jaise hath se TuTi hui patang