bach kar kahan main unki nazar se nikal gaya

bach kar kahāñ maiñ un kī nazar se nikal gayā

ik tiir thā ki saaf jigar se nikal gayā

ḳhud raftagī hī chashm-e-haqīqat jo vā huī

darvāza khul gayā to maiñ ghar se nikal gayā

mahv-e-jamāl rah ga.e ham kuchh ḳhabar nahīñ

aayā kidhar se yaar kidhar se nikal gayā

kaisā havā huā mire rone ko dekh kar

dāmān-e-abr dīda-e-tar se nikal gayā

rone se hijr-e-yār meñ taskīn ho ga.ī

dil kā buḳhār dīda-e-tar se nikal gayā

āḳhir kiyā aḳhīr-e-shab-e-vasl ne mujhe

dam pahlī bāñg-e-murġh-e-sahar se nikal gayā

aahoñ ne mujh ko ātish-e-ġham se najāt dī

mānind-e-dūd nār-e-saqar se nikal gayā

dikhlāyā nā-tavānī ne ghar yaar kā mujhe

misl-e-nigāh rauzan-e-dar se nikal gayā

saaqī kī chashm-e-mast ne aise dhueñ uḌaa.e

sho.ala sā ek ātish-e-tar se nikal gayā

joban se Dhal chalī haiñ kahāñ ab laTak kī chaal

vo pech un ke mū-e-kamar se nikal gayā

us gul ke dāġh-e-ishq ne aisā kiyā gudāz

ghul ghul ke maġhz sham.a ke sar se nikal gayā

mushkil hai ai 'sabā' pa karo jabr iḳhtiyār

hai ḳhair dil jo ishq ke shar se nikal gayā

bach kar kahan main un ki nazar se nikal gaya

ek tir tha ki saf jigar se nikal gaya

KHud raftagi hi chashm-e-haqiqat jo wa hui

darwaza khul gaya to main ghar se nikal gaya

mahw-e-jamal rah gae hum kuchh KHabar nahin

aaya kidhar se yar kidhar se nikal gaya

kaisa hawa hua mere rone ko dekh kar

daman-e-abr dida-e-tar se nikal gaya

rone se hijr-e-yar mein taskin ho gai

dil ka buKHar dida-e-tar se nikal gaya

aaKHir kiya aKHir-e-shab-e-wasl ne mujhe

dam pahli bang-e-murgh-e-sahar se nikal gaya

aahon ne mujh ko aatish-e-gham se najat di

manind-e-dud nar-e-saqar se nikal gaya

dikhlaya na-tawani ne ghar yar ka mujhe

misl-e-nigah rauzan-e-dar se nikal gaya

saqi ki chashm-e-mast ne aise dhuen uDae

shoala sa ek aatish-e-tar se nikal gaya

joban se Dhal chali hain kahan ab laTak ki chaal

wo pech un ke mu-e-kamar se nikal gaya

us gul ke dagh-e-ishq ne aisa kiya gudaz

ghul ghul ke maghz shama ke sar se nikal gaya

mushkil hai ai 'saba' pa karo jabr iKHtiyar

hai KHair dil jo ishq ke shar se nikal gaya