bach ke wo nikalte hain jin se ru-shanasi hai

bach ke vo nikalte haiñ jin se rū-shanāsī hai

zindagī hamārī to ab ajal-numā sī hai

jazb ho ga.ī dil kī be-kalī fazāoñ meñ

is taraf hai sannāTā us taraf udāsī hai

dilkashī ġhazab kī hai husn-e-sāda-kārī meñ

kis ke dast-e-rañgīñ ne phuul kī qabā sī hai

ḳhushkī-e-lab-e-sāhil kah rahī hai pyāsoñ se

kyā bisāt-e-dariyā ḳhud us kī ruuh pyāsī hai

is qadar paḌā paanī khet jal gayā saarā

abr kī tabī.at bhī barq-e-sho.ala-zā sī hai

rūh-e-ḳhud-shanāsī hai aadmī kī ḳhuddārī

ḳhud-shanāsī-e-insāñ asl-e-haq-shanāsī hai

bach ke wo nikalte hain jin se ru-shanasi hai

zindagi hamari to ab ajal-numa si hai

jazb ho gai dil ki be-kali fazaon mein

is taraf hai sannaTa us taraf udasi hai

dilkashi ghazab ki hai husn-e-sada-kari mein

kis ke dast-e-rangin ne phul ki qaba si hai

KHushki-e-lab-e-sahil kah rahi hai pyason se

kya bisat-e-dariya KHud us ki ruh pyasi hai

is qadar paDa pani khet jal gaya sara

abr ki tabiat bhi barq-e-shoala-za si hai

ruh-e-KHud-shanasi hai aadmi ki KHuddari

KHud-shanasi-e-insan asl-e-haq-shanasi hai