bacha ke rakkha hai jis ko ghurub-e-jaan ke liye

bachā ke rakkhā hai jis ko ġhurūb-e-jāñ ke liye

ye ek sub.h to hai sair-e-bostāñ ke liye

chaleñ kahīñ to siyah-dil zamānoñ meñ hoñgī

farāġhateñ bhī is ik sidq-e-rā.egāñ ke liye

likhe haiñ lauhoñ pe jo murda lafz un meñ jiyeñ

is apnī ziist ke asrār ke bayāñ ke liye

pukārtī rahī bansī bhaTak ga.e revaḌ

na.e giyāh na.e chashma-e-ravañ ke liye

sahar ko niklā huuñ meñh meñ akelā kis ke liye

daraḳht abr huā bū-e-ham-rahāñ ke liye

savād-e-nūr se dekheñ to tab surāġh mile

ki kis maqām kī zulmat hai kis jahāñ ke liye

to raushnī ke malīde meñ rizq kī ḳhātir

maiñ raushnā.ī ke guude meñ āb-o-nāñ ke liye

taras rahe haiñ sadā ḳhisht ḳhisht lamhoñ ke des

jo mere dil meñ hai is shahr-e-be-makāñ ke liye

ye nain jaltī lavoñ jiitī nekiyoñ vaale

ghane bahishtoñ kā saaya haiñ arz-e-jāñ ke liye

zamīr-e-ḳhāk meñ ḳhufta hai merā dil 'amjad'

ki niiñd mujh ko milī ḳhvāb-e-raftagāñ ke liye

bacha ke rakkha hai jis ko ghurub-e-jaan ke liye

ye ek subh to hai sair-e-bostan ke liye

chalen kahin to siyah-dil zamanon mein hongi

faraghaten bhi is ek sidq-e-raegan ke liye

likhe hain lauhon pe jo murda lafz un mein jiyen

is apni zist ke asrar ke bayan ke liye

pukarti rahi bansi bhaTak gae rewaD

nae giyah nae chashma-e-rawan ke liye

sahar ko nikla hun meinh mein akela kis ke liye

daraKHt abr hua bu-e-ham-rahan ke liye

sawad-e-nur se dekhen to tab suragh mile

ki kis maqam ki zulmat hai kis jahan ke liye

to raushni ke malide mein rizq ki KHatir

main raushnai ke gude mein aab-o-nan ke liye

taras rahe hain sada KHisht KHisht lamhon ke des

jo mere dil mein hai is shahr-e-be-makan ke liye

ye nain jalti lawon jiti nekiyon wale

ghane bahishton ka saya hain arz-e-jaan ke liye

zamir-e-KHak mein KHufta hai mera dil 'amjad'

ki nind mujh ko mili KHwab-e-raftagan ke liye