bad-gumani ko baDha kar tumne ye kya kar diya

bad-gumānī ko baḌhā kar tum ne ye kyā kar diyā

ḳhud bhī tanhā ho ga.e mujh ko bhī tanhā kar diyā

zinda rakhne ke liye rakkhā hai achchhā silsila

ik miTāyā dūsrā armān paidā kar diyā

aap samjhāne bhī aa.e qibla-o-ka.aba to kab

ishq ne jab be-niyāz-e-dīn-o-duniyā kar diyā

bandagān-e-daur-e-hāzir kī ḳhudā.ī dekhiye

jis jagah jis vaqt chāhā hashr barpā kar diyā

kal kī kal hai kal jab aa.egā to samjhā jā.egā

aaj to saaqī ne dil kā bojh halkā kar diyā

mohtaram pī lījiye mausam ne mauqa.a de diyā

dekhiye kaalī ghaTā ne uTh ke pardā kar diyā

vo ghar aa.e the 'nazīr' aise meñ kuchh kahnā na thā

shukr kā mauqa.a thā pyāre tū ne shikvā kar diyā

bad-gumani ko baDha kar tum ne ye kya kar diya

KHud bhi tanha ho gae mujh ko bhi tanha kar diya

zinda rakhne ke liye rakkha hai achchha silsila

ek miTaya dusra arman paida kar diya

aap samjhane bhi aae qibla-o-kaba to kab

ishq ne jab be-niyaz-e-din-o-duniya kar diya

bandagan-e-daur-e-hazir ki KHudai dekhiye

jis jagah jis waqt chaha hashr barpa kar diya

kal ki kal hai kal jab aaega to samjha jaega

aaj to saqi ne dil ka bojh halka kar diya

mohtaram pi lijiye mausam ne mauqa de diya

dekhiye kali ghaTa ne uTh ke parda kar diya

wo ghar aae the 'nazir' aise mein kuchh kahna na tha

shukr ka mauqa tha pyare tu ne shikwa kar diya