badal badal ke teri be-ruKHi ne dekha hai

badal badal ke tirī be-ruḳhī ne dekhā hai

ye hādsa bhī mirī bebasī ne dekhā hai

mujhe ḳhabar hai ki zulmat Thahar nahīñ saktī

mujhe patā hai ise raushnī ne dekhā hai

mirī ġhazal hai sulagte huoñ ne dekhā hai

ki merā aks mirī shā.irī ne dekhā hai

meñ jhuum jhuum gayā le ke aasrā us kā

ki merī samt achānak ḳhushī ne dekhā hai

bichhaḌ ke jaise dobāra bhī aa milā huuñ use

kuchh is adā se mujhe zindagī ne dekhā hai

jo puure chāñd se baḌh kar hasīn hai yaaro

vo ik sitāra hai jis ko sabhī ne dekhā hai

ye raaz chhup nahīñ saktā hai merī bastī kā

sitam kā sail-e-ravāñ har kisī ne dekhā hai

tū jis bhī ruup meñ aa.e to jaan jā.eñge

ḳhayāl-e-yār tujhe āshiqī ne dekhā hai

vahī 'nisār-turābī' jabīñ kā hāsil hai

vo ek sajda jise bandagī ne dekhā hai

badal badal ke teri be-ruKHi ne dekha hai

ye hadsa bhi meri bebasi ne dekha hai

mujhe KHabar hai ki zulmat Thahar nahin sakti

mujhe pata hai ise raushni ne dekha hai

meri ghazal hai sulagte huon ne dekha hai

ki mera aks meri shairi ne dekha hai

mein jhum jhum gaya le ke aasra us ka

ki meri samt achanak KHushi ne dekha hai

bichhaD ke jaise dobara bhi aa mila hun use

kuchh is ada se mujhe zindagi ne dekha hai

jo pure chand se baDh kar hasin hai yaro

wo ek sitara hai jis ko sabhi ne dekha hai

ye raaz chhup nahin sakta hai meri basti ka

sitam ka sail-e-rawan har kisi ne dekha hai

tu jis bhi rup mein aae to jaan jaenge

KHayal-e-yar tujhe aashiqi ne dekha hai

wahi 'nisar-turabi' jabin ka hasil hai

wo ek sajda jise bandagi ne dekha hai